Pakistan Northwest tsütsü 25 pokset; 30 shi yiru

Peshawar, September 16 (Agencies): Peisasa pokseta asütsü mulungteter kati bomb pokdakja Pakistan northwest tsütsülen tentetba mosque ka nung lendong kanga sashia tanü, Hokolbar nü atalokdaktsüba osang ka sorkar ketdangsertemi metetdaktsüogo.
“Tanü lendong atalokdaktsütsüsangi ‘Allahu Akbar’ ta ayimoktsüba sülen pa temang nung alenokba bomb pokdakja lendongji ataloktsüba osang jangjaogo,” ta parnoki ashi.
“Afghanistan arrtsülen, Federally Administered Tribal Areas (FATA) kübok Mohmand Agency nung densemba Payee Khan yimtsüng nung atalokba lendong nung nisung 25 shi poksetba aser nisung 30 shi yiruba osang tang tashi nung jangjaogo,” ta Mohmand Agency nung deputy administrator, Naveed Akbar-i osang jangjashitsü.
“Tanü bomb apokba ajanga mosque ki shilem ka jirepa sarasadema alirtem anenbang aser rescue ketdangsertemi anenbanga alir nisungtem tutettsü maparen tanga  teinyakdak lir,” ta pai shisem.
“Kiralongrartemi tan amala lendong atalokdaktsüba ajanga Pakistan sorkari ozü linük ajunga nung kiralongrar samatsütsü mapatong manentsütettsü,” ta shia, Pakistan Ato Kilonser, Nawaz Sharif-ia tanü lendong atalokdaktsüba atema aitsüba olen ka metetdaktsüogo.
Pakistan nung taoba mapang denbo tang tensa tajungba akümtsü tenzüka lir saka par linük tentetba Taliban telungpur aser Islamic kiralongrartemi tan amala lendong mapang shia atalokdakja tensa mejungi kümdaktsütsü merangba osang bushiteta lir.