Pakistan Northwest tsütsü 6 pokset; 31 shi yiru

Peshawar, September 01 (Agencies): Piesasa pokseta asütsü mulungteter kati pa temang nung alenokba bomb Pakistan northwest tsütsü tentetba sorkar office ki ka kilung nung tanü Mongolbar nü pokdakja lendong atalokdaktsüba osang jangjaogo ta police-i metetdaktsü.

Tanü lendongji mepetmesü agi asüngba Khyber tribal district kübok Jamrud jila nung atalok aser iba lendong nung ishiba agi nisung 6 poksetba aser niung 31 shi yiruba osang tang tashi nung jangjaogo ta parnoki ashi.

“Piesasa pokseta asütsü mulungteter kati pa temang nung alenokba bomb pokdakja lendong atalokdaktsüba sülen tang tashi nung nisung 6 poksetba aser nisung 31 shi yiruba osang bushiteta lir,” ta Khyber tribal administration ketdangser, Shahab Ali Shah-i osang jangjashitsü.

Tan asürtem rong nung tribal police ketdangser 4 densemba den külemi, yirurtem rong nunga parnok 15 shi densemba osang jangjaogo ta pai ashi.

Tanü lendong atalokdaktsüba asoshi telok shingaia tang tashi nung tenüng agia metetdakja mali ta paisa shisem.

Ajisüaka, tanü lendong atalokdakji Taliban aser par telok den sentaktepba Islamist kiralongrartem tesep tentetdak aliba yong parnok rong nung telok kati tanü lendongji atalokdaktsü südi ta Shahab-i temulung malemba olen ka metetdaktsü.

Pakistan mitkartemi küm 1 tejaklen nungi tenzüka Khyber tribal region nung tesep tentetba telungpur aser kiralongrar mita parnok den tongpang kanga sashia raraba osang bushiteta lir.