Pakistan northwest tsütsülen bomb lendong atalok; 12 pokset

Pakistan northwest tsütsü Peshawar yimti tezülen tentetba mitkar checkpoint ka nung pokshiba lendong tesashi ka tanü Mongolbar nü atalokdaktsüba sülen Pakistan rescue ketdangsertemi tzü agi mi renemseptsüba noksa nung angur. (Peshawar, January 19)

Peshawar, January 19 (Agencies): Peisasa pokseta asütsü melungteter kati Pakistan northwest tsütsülen pokshiba lendong tesashi ka tanü, Mongolbar nü atalokdaktsüba osang ka sorkar ketdangsertemi metetdaktsüogo.
Tanü amaksangi motorbike ka nung mener arua Khyber tribal district aser Peshawar yimti na arrtsülen tentetba mitkar checkpoint ka nung pokshiba lendongji atalokdaktsü ta parnoki ashi.
“Tanü lendong nung mitkar züngsemtem timba densema, nisung 12 shi poksetba aser ano, nisung 18 shi yiruba osang tang tashi nung jangjaogo,” ta rescue aser police ketdangsertemi osang jangjashitsü.
Nisung yirua poksetba den külemi, lendong atalokdak anena aliba gari ishika rongdokba osanga jangjaogo.
“Ozü züngsem kati tanü lendong kanga sashia atalodaktsüogo,” ta shia, tanü lendong atalokdaktsüba atema Pakistan nung tentetba Taliban teloki tenüng agia metetdaktsüogo.
Tan lendong atalokdak, Khyber ya Pakistan aser Afghanistan na tsüngda shishilembatsü tongti lenmang ana rong nung ka lir.
Yashi, Hombar nüa Pakistan southwest tsütsülen tentetba Quetta yimti nung jajaba mitkar gari convoy ka anasa bomb lendong atalokdaktsüba osang jangjaogo.
Yashi lendong nung mitkar züngsem 5 poksetba aser parnok nisung 3 tashi yiruba osanga jangjaogo.
Quetta nung atalokba lendongjia par telokisa inyak ta Taliban teloki tenüng agia metetdaktsüogo.