Pakistan NSA, Sartaj Aziz-i August 23 nü India semdangtsü

New Delhi, August 13 (Agencies): Pakistan Ato kilonser Nawaz Sharif atema National Security & Foreign Affairs (NSA) Advisor, Sartaj Aziz-i August 23 nü India semdanga tang mezüng India Ato kilonser atema NSA advisor, Ajit Doval den NSA-level senden amentsü osang tanü Brihostibar jangjaogo.

“August 23 nü ni India semdangtsü ta ni osang jangjatsür,” ta osangbenertem senden ka nung Aziz-i metetdaktsüogo ta Dawn osang ajanga ashi.

Aziz-i ashiba agi, iba telemtetba ya ketdangsertem den lemteper agia liasü.

Ketdangsertemi ashiba agi, yasüng Ato kilonser Sharif Belarus nungi meyipa aruba sülen pai iba telemtetbaji agizüka liasü.

Yaküm New Delhi nung Pakistan ketdangseri Kashmiri Separitist lenirtem ajuruba ajanga August ita nung India-i Pakistan linük den High level senden thinenja liasü.

2008 küm kiralongrartemi Mumbai amakba ajanga “Composite Dialogue” nüngja nung linük ana tsüngda ken o jembitsü aliba sentong-a India-i thinenja liasü.

“Security ken oji Composite Dialogue asentenshiba ka mesüaka, iba senden nung tongtibang ken o kar nung o lemtepba ajanga telemtetba kar agitettsü,” ta Pakistan lenir Aziz-i ashi.

“Ken o jembitsü senden ya tongtibang onüktem yimjung nung latettsü asoshi lir ta Ato kilonser Nawaz Sharif-i bilemer,” ta paisa ashi.

July 10 nü Russia, Ufa yimti nung Ato kilonser Narendra Modi aser Pakistan Ato kilonser Nawaz Sharif na senden amenba mapang linük ana tsüngda National Security Advisor (NSA)-level sendenji August 23 aser 24 nü amentsü India-i benoka liasü.

Iba senden nungji linük anapronglai kiralongrartem anema noktaktsü bangjemtepa tekaraba nung Delhi nung senden amentsü bangjema liasü.

Ajisüaka arrtsülen ceasefire alema aiben inyakba aser taoba ita Punjab amakba ajanga taruba senden atema tasüngdangba ka arur.

Taoba hopta Aziz-i, Kashmir onük densema parnoki India den tongtibang onük aika benoka jembiner, ta shiogo.