Pakistan nung 5.9 magnitude monoknok anok

Islamabad, February 21, (Agencies): Deobarnü Pakistan tesem kar nung 5.9 Richter scale magnitude menoknok ka anok, ta local Met office ajanga metetdaktsüogo.
Pakistan meteorological department-i ashiba agi, iba menoknok anokba tiyongtsüji Afghanistan Hindu Kush tenem nung kilometre 157 ali telunglen ia lir, ta Xinhua osang ajanga metetdaktsü.
Iba menoknok yagi Khyber Pakhtunkhwa province aser Peshawar yimti nung dena kongshia liasü.
Met office director general Ghulam Rasool-i, ano taruba ita ishika linük nung menoknok anoktsü kechiba süra Hindu Kush tenem anasa aliba Eurasia aser India ‘tectonic plates’ tem ya tang menoknok anoktsü kanga active lir, ta ashi.
Pai ashiba agi, India aser Eurasia tectonic plates tem kodang ajurutepdir item plate tem yagi tashi balaka agütsür aser ibaji ajanga seismic waves adokdaktsür.
Iba menoknok ajanga tesem nung aliba nüburtem kanga aoksatepdaktsü ajisüaka tia kanga ka-a taküm samaba aser takoksa aluba osangbo tang tashi nung kecha mali.