Pakistan nung Bollywood film tem sayutsü mapang agitsü:Nadeem

Islamabad December 22, 2016 : Cineplex kibur Nadeem Mandviwala-i, Pakistan nung Bollywood film tasentem sayutsü atema mapang agitsü, ta ashi.
Brihostibarnü Dawn osangkaket nung Mandviwala-i ashiba osang ajanga metetdaktsüba agi, Pakistan nung Bollywood film sayutsü mesayutsüji India nunger dak aket.
September nung India aser Pakistan na tsüngda mangatettep adokba süngjema maküm tashi Pakistan nung India nunger film mesayutsü ta Pakistan nung aliba cinema kiburtemi telemtetba agi.
Indian Motion Picture Producers Association-i India movie tem nung Pakistan nunger actor tem shilem magidaktsütsü telemtetba agiba sülen Pakistan-ia parnok telemtetbaji agi.
Iba telemtetba ajanga Pakistan cinema rongsenkettsüng akoksaogo kechiba süra iba inyakyim ajanga film sayuba ajemba agi terepranga ajema aküm, ta Dawn osangkaket ajanga metetdaktsü.
India indang film tem mesayutsü lemtetba agientsü atema taoba hopta telemtetba ka agiogo aser Pakistan nung tesüiba mapangtem nung sayur aliba India nunger film tejen kar sayutsü tenzükogo.
Mandviwala-i, tangsa tangbo India nunger film tasen mangutsü amai bilemer, ta ashi.
“India nunger movie tasen sayutsü atema ita jungnüa agitsü akok. Onoki nokdanga aliba agienogo anungji India nungeri Pakistan dang film ayok nungbo sayutsü. Parnoki film ayok nungbo onoki sorkar dang nungi no objection certificate (NOC) meshitsü. NOC ji agütsü nungbo film tem ji Pakistan Censor Board-i agizüktsü. Iba sülenjiang onoki India nunger film tasentem sayutsü ta shitettsü,” ta paisa ashi.