Pakistan nung bomb tesashi apok, nisung aika asü

Quetta, August 13 (Agencies): Pakistan anülulen tsütsü Iran aser Afghanistan den arrtsülen aliba Balochistan province nung bomb tesashi ka Honibar aonung apok, aser iba lendong nung nisung 15 taküm sama aser 32 yiru, ta ketdangser ajanga ashi.
Iba bomb ya provincial yimtiba Quetta nung bus anendak apok aser temeket tesem nung mi jangroloka ao.
“Tang tashi nung iba lendong nung asür nisung 15 lir. Tajemba agi nisung 32 yiruogo aser maneni bushisüngdang südagi,” ta Balochistan home minister, Sarfraz Bugti-i osangbener dang ashi.
Iba lendong nung nisung asüba aser yirur indang kuli ya Balochistan sorkar indang odongtar, Anwar ul Haq Kakar-ia metetdaktsü.
Bugti workers temi mi remsep aser iba yimti nung doctor tem anisüngzüka aliba ajunga tanaben jadenogo, ta kasa sangdong ajanga ashi.
Iba lendong adokba indang kuli tejangja monguteti lir saka bushisüngdang tenzükogo, ta osang ajanga ashi.
Iba lendong agütsüba tenüng ya telok katia agia mali saka Quetta yimti nung taoba mapang nunga Taliban aser Islamic State telungpurtemi lendong agüja aru.
Balochistan nung totzü aser gas amala ali rongsen jenti liaka Islamist telungpur, Sunni aser Shiite Muslim tsüngta azüdokshiba ajanga mapa meinyakteter.