Pakistan nung IPL 2019 asaya mesayutsü lemtetogo

Islamabad, Metsüremi/March 22 (Agencies): Pakistan sorkar ketdangsertemi aruya aliba Indian Premier League (IPL) cricket asayamung ya par linük nung mesayutsü lemtetogo.
Pakistan Minister of Information and Broadcasting, Fawad Ahmed Chaudhry-i iba osang ya Brehistibarnü jangjatsü. Sen jenti indoka ayongzükba IPL season 12buba ya March 23 nungi tenzüktsü renema lir, saka Pakistan nungbo iba asayamung ya mesayutsü. Chaudhary-i ashiba agi, India sorkar aser company temi Pakistan Super League junga magizükba ya tesasatsüka lir aser kidanger linükia India nung PSL junga magizükba ama IPL ya magizüktsü.
PSL ya India nung DSport ajanga sayua liasü saka iba asayamung league match mesayui lir knockout stage mapang nungang sayutsü lemtet. Pulwama amakdang kiralongrartemi CRPF sepai 40 tepsetba ajanga DSports ajanga India nung PSL mesayutsü lemtet.
Iba lendong agütsüba asoshi longkak aita India nung state cricket board karibo Pakistan cricket dak sendakba nüngu osettem aser noksatem agizüka ayu. PSL indang official producer IMG Reliance-ia iba lendong atalokba sülen atsünginba ajanga Pakistan nung asayaba T20 asayamung tom nung production company tasen ka bushitsüsa aküm.
“PSL mapang India nunger company aser sorkari Pakistan cricket amshiba ama onokia Pakistan nung IPL mesayutsü,” ta Chaudhry-i ashi.
Chaudhry-i India sorkar aser Indian cricket team-i cricket aser yimtenren meyokteper, ta aija liasü.
Taoba mapang Australia den One Day International match pongu asayaba mapang Pulwama lendong nung asürtem nem akhum agüja Indian team-i Ranchi nung asayadang sepaitemi asemba korang semer asayaba asoshi Pakistan Cricket Board (PCB) ajanga International Cricket Council (ICC) dang BCCI merenshitsü asüngdanga zülua liasü.
“Onoki yimtenren aser cricket balala lidaktsütsü meranger, saka Indian cricket team-i Australia den sepaitem korang semer asaya. Iba atema temerenshi kecha magütsü. IPL ya Pakistan nung mesayura IPL aser Indian cricket asoshi takoksa asütsü amai ni bilemer. International cricket nung onoka tashi tait lir,” ta Chaudhry-isa ashi.
Maneni World Cup nung Pakistan masayadaktsütsü asoshi India nung ola adoker. Harbhajan Singh aser Gautam Gambhir nunger ama India nunger taoba mapang cricket asayar aser tang tesaidak alirtemi Pakistan nem tenokdangba agütsütsü atema jembiogo. BCCI-i ICC dang kiralongrar mesüba linük nem tenokdangba agüjang ta zülu, saka ICC-i iba tezüluba magizük.
ICC-i sorkar dak sendakba maparen nung shilem magitettsü aser züngsem linük dang linük ka den tesendaktep raksatsü meshitettsü, ta ashir.