Pakistan nung Khristan yimtsüng amakdang tanur ka tepset

Quetta, December 5 (Agencies): Pakistan nung Khristan yimsüng Chaman nung bomb ka pokdaktsüdang arishi küm 7 tain tebur tanur ka asü aser nisung aika yiru.
Bomb ji yimtsüng tongti kishi ana apok aser nisung asüba aser yiruba den kijoen aika raksa. Iba mapa ya Islamist temi inyak ta osang angazüker aser yirua alirtemji Chaman hospital nung anepaludar.
“Colony kishi anasa hand grenade ka pokdaktsü. Iba bomb ajanga anameta aliba kichibatem raksatsü” ta police ketdangser Gul Mohammad-i osangbener dang ashi.
Tasüsangji Lucky Saleem liasü ta jangjaogo aser BPCA officer Mehwish-i par kibong den yirua alirtem semdangtsü ta osang ka ajanga metetdaktsü.
Baluchistan nung kiralongrartemi burka agir agricultural research centre ka amakdang nisung 9 tepset aser 35 yiruja liasü. Iba tatalokba sülen anogo ana dang lir Chaman yimtsüng amak.
Kiralongrartemi agricultural research centre amakdang kaketshiri parnok taoksa nung jenshiba osang lemsatep. Iba tatalokba nung sepaitemi kiralongrartem ajak khaset.
British Paksitani Christian Association chairman, Wilson Chowdhry-i ashiba agi, “Pakistan nung Khristantem amakdang nisung takümtem lalur saka Pakistan sorkari media amokbanga ayur aser item osang memetetdaktsür.”
Arishi küm 7 tain tanur ka tepsetba ajanga Pakistan nung Khristantem indang tepetzük tia sayur, ta paisa ashi.
“Pakistan nung Khristantem teküpokba jenjang nung ayuba atema Khristantem amak. Pakistan nung media aser national curriculum ajanga lanur tekolok nung sempaba indang tangatetba sayur aser iba tesayuba ajanga telok tilatem reshikangshitsü ajungmesor. Iba national curriculum ji DFID ajanga teyari agütsür saka British MP temi iba teyariji agientsü memulunger” ta Wilson Chowdhry-isa shisem.
“Linük ajungalen Khristantem tetsübu tia nung alir. Islamist temi Christmas aser Easter mapang Khristantem amaker kechiyong iba mapang asenok telok tulu adenshia sentongtem agir” ta paisa metetdaktsü.
“Pakistan sorkari Taliban aser IS den yariba teloktem mazüoktetba ajanga Pakistan nug Khristan benjung ajak tetsübu aser tarendak ka nung dang amungtsüsa tia ka nung lir” ta Wilson-isa ashi.