Pakistan nung kiralongra

Bodhbarnü (January 20,2016) Islamic kiralongrar telok ka Pakistan, Charsadda nung aliba Bacha Khan University telungi ia nisung 30 tepsetba aser nisung 10 dak tema yirutsüba ajanga Pakistan sorkari kiralongraba anema takok ngua meinyaktetba maneni kuli sayuogo. Tamakertem jagi tetsübu tali kadaktsütsü nükjidong nung kaketshir aser tesayurtem aika dak tekolak nung injang kahlokja tepset. Iba tatalokba ajanga 2014 December 16 nü Tehrik-i-Taliban (TTP) den sentaka aliba kiralongrar teneti Pakistan, Peshawar nung Army Public School ka amakdang school tanur 132 densema nisung 141 tepsetba bilemteter. Peshawar nung school amakba sülen iba nungjagi kilometer 47 shi dang pilar aliba Charrsadda nung tang kaket reju ka amakba ajanga Taliban telungpurtemi Pakistan nung koba tesem nung südir süaka timtem agütsütettsü ta osang agütsür. Pakistan nung kiralongrartemi tanen makai school aser college tem amaker, aser iba ya ajanga ‘jihadi’ kiralongrartemi shisaliok anemba sayur, kechiyong shisaliok ajanga linük renloker aser nüburtem nem tashi tali agütsür. Taoba mapang nunga shisaliok noktangtsü nükjidong nung Swat Valley nung Taliban kiralongrartemi tetsür chanutem shisaliok atema nokdaker, Malala Yousafzai tepsettsü meranga liasü. Bodhbarnü kiralongrartemi Bacha Khan University amakba anogo ya, Khan Abdul Ghaffar Khan asüba anogomung liasü. India nüjiso atema raradang Khan ya Congress party lenir ka liasü. Tesülen pa Pakistan nungang alitsü lemtetaka India-i pa nem Bharat Ratna Award agütsüogo. Taliban-i tang University amakba ajanga Khan indang tangatetba aser tesayubatem ajak anemba sayur. Tang mapang ya Pakistan-i Khan tesayuba nung anidaktsü atema mapang tajung ka lir. Pakistan linüki tarutsü lanu putu atema kiralongrar tamajung (security sepai amakertem) aser kiralongrar tajung (India, Afghanistan aser anüdoklen aliba linüktem anemertem), ta kecha mebendangi kiralongrar ajak anema noktaktsü mapang tongogo. Item tatalokbatem nungi tansütsü agir Pakistan-i shisaliok rejutem kümzüka ayutsü atema kanga nendaka inyaktsüla. Iba nungji tamakok ngura alima tsüngdang par linük tejak medentettsü. Tarütsü lenirtemji kaketshirtem lir, aser parnok tiaji kiralongrartem nem mamoksepdaktsütsüla. Pakistan mitkartemi mapang shia kiralongrartem tepsetba sangdonger, ajisüaka kiralongrar meshimeshia mesamatsüteter. Yaküm Pakistan Ato kilonser Nawaz Sharif-i sangdong ka ajanga kiralongrartemi Pakistan linük chirtem tepsetba atema Pakistan sepaitemi kiralongrar anema raraba osang lemsatepba sülen India-i, “Pakistan-i parnok ya ‘Kiralongrartem dang nungi takoksa angurtem’ ta jembir. Atangji nungbo, parnok ya parnoki senotsü agi yariba kiralongrartem aser parnoki mesütetba kiralongrartemi parnok nem meyiper timtem agütsüba angurtem lir,” ta ashi. Taoba mapang British sorkaria, tesüiba kümtem nung kiralongratsü atema asalendong yangluba shilem 70 bo Pakistan nung liasü ta bushiteta liasü. Pakistan ya kiralongrartem jenoka alitsü atema linük tajung ka lir, kechiyong joko Egypt aser Jordan densema Muslim linük aikati jihad yimtenren pu-masemer. Ajioda tanga Muslim linüktemi inyakba ama Pakistan linükia inyaktsü koka lir. Tesüiba ita ishika tsüngda Pakistan sorkar aser mitkartemi par litsü nung kiralongraba anema noktakdar, ajisüaka parnoki Afghanistan, India, aser anüdoklen anema inyaker kiralongrartem anemabo mapusor. Pakistan-i kiralongrar tajung aser tamajung ta bendang tashi par linük kodanga tiptema malitsü aser alimai-a parnok sensamasaja reprangtsü. Pakistan nung tatalokbatem atema alimai meimja reprangba den külemi par sorkari kiralongrartem anema kechi inyaktsü ta repranga atadar.