Pakistan nung LeT tongti lenir ka tepset

Srinagar, September 13, 2015: Srinagar nung Pulwama district kübok Padgampora yimtak Lashkar-e-Toiba (LeT) telungpur züngsem, Irshad Ahmad Ganaie den asüpila sentong agiba mapang Kashmir nungeri yimyim ayimba noksa nung angur. 

Pulwama, September 12 (Agencies): Honibar nü Jammu & Kashmir, Pulwama district kübok Kakapora tesem nung kahtepba mapang security sepaitemi Lashker-e-Toiba (LeT) nung tongti lenir ka tepsetogo, pa tepseter nem sen lakh 10 senpet agütsütsü sorkar sangdonger liasü.
Osang ka ajanga ashiba agi, Army aser police senteper iba tesemji lungbang.
Ketdangser osang ajanga ashiba agi, telungpursangji Irshad Ganie liasü, pa ya Pulwama nungi kilometer 40 shi pila oor Kakapora nung telitak liasü.
2013 June ita Hyderpora nung army ti tepsetba densema police aser army aiben amakba ken o balala nung police-i pa bushia liasü.
Police-i pa ya ‘A++’ category (kanga bushia aliba) telungpur ka liasü.
Kakapora tesem kübok Begum Bagh nung telungpurtem lir ta osang ka angazükba sülen police telok ka iba tesem jagi ao aser rara adoka kahtepba mapang Irshad ji kahset, ta police osang ajangasa ashi.
Police telok dakji telungpurtemi tama akah, iba sülen army temi iba tesem jagi ilonga oa police den senteper kahtepba mapang pa kahset.
Irshad ya kasa district nungi lir aser pa 2011 küm LeT telok nung aden.
Hyderpora tatalokba aser yimti tezülen hotel ka amakba sülen police-i pa kanga meranga bushia liasü.