Pakistan nung nisung 400 dak tema dak HIV putet

Ratodero, Monupii/May 17 (Agencies): Pakistan south tsütsü yimtsüng ka nung tsürapurtem par chirnur HIV tendangtsü asoshi mesüngjemteti atatepba mapang ka lir, kong doctor kati syringe temenen amshiba ajanga nisung noklang aika iba tashi menaloktsüogo.
Sindh province, Larkana kübok Wasayo yimtsüng nung taoba ita screening rooms pongu tenzüktsüba rongnung kati kibongtem aritepa aoba mapang tensa azüoktsü atema police tem yokogo.
Health ketdangsertemi ashiba agi, nisung 400 dak tema hopta ishika tsüngda HIV positive putetogo aser parnok rongnung timba ka tanur lir. Doctor temi merekmeju mesüi hadirtem amshiba aser parnok inyakyim shidak masüba ajanga Pakistan nung tashidak menar timba akümtsü akok ta mongintemi metetdaktsüogo.
Iba tashidak agi kongshir aliba yimtsüng nung nüburtem kanga mit adokba den tetsübu tali kümdar, koba ketdangsertemi ashiba agi, local pediatrician-i temulung magütsüi inyakba mesera ashikelak mulungsentsü dener asaa inyakba maparen ka asütsü.
“Parnok telok telok arur,” ta makeshift clinic nung aliba doctor kati ashi, kong hadir aer nübu peria maliba ajanga shirangertem anepaluba nung tetsükdaktsü ajurur.
Mukhtar Pervez lar jala tendangtsü asoshi kanga mesüngjemteti ataogo aser tawa poktetba tashidak ya yimra agi atongba den sendaktepa alitsü ta tsübua bilemer. Tangar atemabo parnoki tetsübutiba ya asangsang kümogo.
Anogo asem tejakdang par küm 1 jala HIV positive putetba sülen Nisar Ahmed clinic-i meita adoka mozüki bushia aru.
“Doctor shibai item tanurtem ajak tashidak agi menadaktsü ni pa atak atemer,” ta pai meita adoka ashi.
Kasa mapang nung pa anasa Imam Zadi-a lar semchir positive putetba sülen lar tanur pongu HIV tendangtsü asoshi anir arua nokdaka liasü.
“Ozü kinunger ajak kanga mepelar,” ta lai ashi.
Maneni linük ka kong nütsüngyongsük timba yimtsüngtem nung alir aser iba tashidak junga memetetba den treatment dena mangur item tesem nung aliba nüburtemi HIV menalokja parnok chirnurtem tarutsü raksatsüogo ta shisabulua bilemer.
“La den shibai asayatsü? Aser la tain küma aodang shibai la den kibong kümnütsü?” ta kidanger yimtsüng nungi tetsü kati jeba ashi. Lar arishi küm pezü jala-a HIV positive puteta liasü.
Pakistan nung mapang talangka HIV bulua maliasü saka tang iba tashidak ya kanga kara proshia odar, talisa teküp ayoker aser temesepba mozü achirtem iba tashidak agi kanga bulua adonger.
2017 küm kija nung nisung 20,000 shi dak HIV putetba sangdongogo. Asia nung HIV tashi kanga kara prokshia aoba linüktem rongnung Pakistan tanabuba kümogo, ta UN sangdong ka ajanga metetdaktsü.
Kasa mapang nung nütsüngyongsük kanga kara renloka aoba mapang ka nung state-i küm aika senotsü mindokba ajanga healthcare facility jenjang kanga mejungi kümogo aser iba ajanga yimdak yimtsüngtem nung unqualified medical practitioners temi mapa inyaka tebilemtsü bener arur.
“Sorkar report kar ajanga ashiba agi, linük nung taila doctor 600,000 shi lir aser parnok rongnung 270,000 shi Sindh province nung inyaksangshir,” ta UNAIDS sangdong ka ajanga metetdaktsü.
Provincial health officials temi ashiba agi, item clinic tem nung patient tem tashidak aser virus balala menatsü ana nung lir kong injection ya primary treatment ama amshir.
“Sen mechi item doctor tem yagi syringe tejang ka agi patient aika dak tutsür aser HIV prokshiba kuli tongtibangtibaji iba ya asütsü,” ta Sindh Aids Control Programme, provincial programme manager, Sikandar Memon-i ashi.
Temsüa maliba doctor den syringe tanaben amshiba, tekümzükba makai azü belentepba aser tanga inyakyim ajanga küm tem tsüngda HIV tashidak menar aika kümogo, ta Aga Khan University nungi menatepba tashi bushitsüngdangba nung mongin Bushra Jamil-i ashi.
Sindh nung iba tashidak prokshiba ken o asadanger ketdangsertemi ashiba agi, aija alisang doctor daka HIV positive putetogo.
Ratodero yimti nung tepuokdak nungi pai pa anem ken o benokba aitsüogo aser kasa mapang nung ozüng raksartem den ba puoka ayuba ashishia liasü.