Pakistan nung ozüng alema inyaker minute asem tsüngda pua arutettsü

Islamabad, September 29 (Agencies): Pakistan yimtiba, Islamabad nung tan ‘security system’ tasen ka enokba ajanga minute asem tsüngda nung ozüng alema inyakertem kanga junga tendanga jangjar police-i pua arütettsü, ta osang ajanga ashi.
‘Islamabad Safe City Project’ dak sentakba nung iba sen billion 14 alang system ya Islamabad nung tesem shisa enokja lir, ta Mongolbar nü The News osangkaket ajanga sangdongogo.
“Iba system teyari ajanga National Database & Registration Authority (Nadra)-i temulung malenba nisungtem noksa den parnok inyakyim ajak online ajanga agütsütettsü aser iba osang ngulii Rapid Response Force (RRF)-i minute asem tsüngda nung item nisungtem aliba tesem tonga oa parnok pua arutettsü,” ta osang ajangasa ashi.
Iba project ya ajanga ketdangsertemi tatalokdak osang ajak meteta, karakara teinyaktsü tim inyaktettsü, ta Interior Ministry nung ketdangser tejen kati ashi.
“Tapoktsü agi mepoksatetba tesem aser control centre-a ka lapokogo. Iba system nung shilem agitsü asoshi police 200 dak tema China-i yoktsü,” ta pa ashi.
Iba project ya mezüng China nung aliba company kati küm ka tendangtsü. Iba sülen Nadra aser district ketdangsertem den intelligence agency temi amshitsü sentong lir.
Iba project nung ID card, gari registration aser driver licence nüngdaktsü, ta paisa shisem.