Pakistan nung taoba mapang general ka NSA tasenba kümogo

Islamabad, October 23 (Agecnies): Tang India den kanga mepetmesü adokba aser army tashi tali itshitsü nüngdakba mapang ka nung Pakistan nunger Lieutenant general nungi anisüngker alisang, Nasser Khan Janjua linük asoshi advisor (National Security Advisor (NSA)’ asütsü shimogo.

Sorkar-i shisatsü kanga tesüngjem aketsang, Sartaj Aziz melena NSA tasenba asütsü Janjua shimba osang tejangja Brihostibar nü metetdaktsüogo. Sartaj Aziz ya tang foreign affairs tsütsü maparen tenzüktsü.

“Janjua NSA tasenba asütsü shimba osangji tejangja aser pa mendenji kilonser den saku züngshitsü,” ta ketdangsertemi metetdaktsüogo.

Nasser Khan Janjua ya Balochistan province nung aliba Quetta ‘Southern Command’ nung Lieutenant general liasü aser tan ita tetenzüklen ang iba mapa nungi anisüngzüka liasü.

Janjua meshim dang arishi küm 85 tain, Sartaj Aziz-i, NSA aser foreign affairs advisor mapa repa bena liasü.

Tang NSA tasenba shimba ajanga Sartaj Aziz foreign affairs mapang kija nung temulung agütsütsü maongka nguogo. Mapa ana repa abenba ajanga pai foreign affairs maparen nung mapang kanga magütsüteti liasü, ta ketdangsertemi ashi.

Janjua indang office ji mezüng bilemba ama Foreign Office nung masü saka Ato Kilonser Secretariat nung alitsü.

Pa shimba ajanga army tem mera tuluba agitettsü.

Pa shimer mezüng aser tang teinyaktsü mapatemji anüdoklen India aser anülulen Afghanistan linüktem nung security maparen tenzüktsü.

Tang nungi shir NSA dak sentakba ken o ajak New Delhi den pai jembitsü.