Pakistan nung totzü abenba gari ka apok, nisung 145 asü

Bahawalpur, Pakistan nung June 25 nü oil tanker ka apokba tesem nung sepai ka nüka nokdaka aliba noksa nung angur.

Bahawalpur, June 25 (Agencies): Pakistan anüdoklen Punjab province nung aliba Bahawalpur anasa lenmang nung totzü abenba gari ka mekeboka apok aser iba mapang nisung 145 rongset aser aika yiru.
Deobar anepdang mekebokba gari nungi totzü yimzüka aluba bendentsü asoshi nisung aika iba tesem-i sentep aser iba mapang mi adoka nisungtem ya rongset, ta osang ajanga ashi.
Iba mi adokba sülen milak tulu anüngleni atu aser mokozü tanak agi iba tesem asüng, ta osang ajanga ashi.
Iba tesem-i totzü bendentsü asoshi arur indang gari aika, ki oset, chipo-aonbo aser tzü ataba oset aika iba tesem nung rongdok, ta osang ajanga ashi.
Iba lendong adokba tejangja memeteti lir saka tenük kuli alir kari ashiba agi, totzü abenba gari indang tetsüng ya apok, ta police tanishir, Raja Riffat-i ashi.
“Totzü abenba gari mekepokba sülen iba tesem anasa aliba Ramzanpur Joya yimtsüng nungi nisung aika oset balala bener senden aser telok aika motorcycle nung aru aser totzü ya bendentsü tenzük,” ta Raja-isa ashi.
“Minute 10-shi lir totzü abenba gari ya apok aser milong tulu adoka nüburtem totzü bendena aliba ya rongdok. Mi ya koma sür adokar anu mejangjateter,” ta Raja-isa shisem.
“Iba tesem ya mi agi asüng aser nisungtem dak mi kaolok. Iba mapang nisung timba totzü beneloker aotsü liasü, anungji kümzüktsü lenmang meliasü,” ta osangbener kati ashi.
Iba lendong nung mi agi rongsetertem timba ajitettsü asoshi tasak kümogo.
Nisung 100 dak tali Ahmedpur East nung aliba mozükidangi bener aru aser parnok temang shilem 80 dak tali nung mi agi ronger liasü aser parnok ya mozüki tuluba-i bener ao, ta Ahmedpur mozüki nung aliba doctor kati ashi.
Iba lendong nung yirur aliba nisung 90 bo Bahawalpur Victoria Hospital-i bener ogo.
Iba lendong nung rongseter aser yirur alir rongnung aika tanur lir, ta mozüki ka nung doctor, Mohamed Ahmed-ia ashi.
DNA amshia nisung rongseta alirtem jangjaba mapang lir, ta Punjab indang law minister, Rana Sanaullah-i osangbener dang ashi.
Iba gari anisang ya police temi pua lir.
Iba lendong asoshi sasa-a bilemer, ta Pakistan Ato Kelonser, Nawaz Sharif-i ashi aser yirur alirtem ajunga mozüki tajungba nung anepalutsü asoshia sangdong ka nung pai shisem.