Pakistan nung tzünglu lendong agi nisung 31 süogo

March 12, 2016 : Quetta, Pakistan nung tzünglu tesashi aluba sülen tzümetsünga aliba tesem nung nisung aser gari jajaba noksa nung angur.

Islamabad, March 13 (Agencies) : Pakistan nung anogo asem tsüngda tzünglu lendong ajanga tajemba agi nisung 31 süogo aser nisung 47 shi yirur lir, ta Deobarnü ketdangsertemi ashi.
National Disaster Management Authority (NDMA)-i, tatalokba balala nung tzünglu lendong agi linük anüolentip tsütsü aliba Balochistan province nung tamajungba kongshi aser iba tesem kija nung nisung 17 asü, nisung 15 yiru aser ki 48 tashi raksa, ta sangdong ka ajanga metetdaktsüogo.
Ano anüdoklentip tsütsüa tzünglu tesashi agi amshiogo aser ibaji ajanga kilem aika chireptsü.
Iba tesem nung tzünglu lendong ajanga nisung 8 asü, nisung 18 yiru aser ki 3 raksa, ta NDMA-i ashi.
Ketdangsertemi ashiba agi, Orakzai nung nagmati atuba tesem ka nung tzünglu alua anentsüh aluba ajanga yangji aayanger pongu iba lendong nung süogo aser trok yirur lir.
Osangbenertemi mezüngbo iba tesem nungji parnok nisung tenet süogo aser 10 yiru, ta sangdonga liasü.
Linük northwest tesemlen Khyber Pakhtunkhwa province nunga tzünglu lendong ajanga nisung ka asü, ti yiru aser ki ana raksatsüogo.
Pakistan director general office ajanga ashiba agi, iba tzüngsang mopung ya Hombar anepdang tashi kasa alitsü aser Bodhbarnü nungi tenzüka ano tzünglu balaka alutsü.
Iba tzünglu jagi Balochistan, Sindh, Khyber Pakhtunkhwa (KP), Punjab aser linük tesem aika nung kongshitsü aser aji March 19 tashi alitsü, ta director general-i ashi.
Linük nung iba ama tzünglu tesashi kodanga majangshidang, ajisüaka tsüngküm mongpu melenshiyim akhi ama mesüi pa mulungka nung melenshiba ajanga Pacific Ocean akhidang dang nungi tatsükba kümdaktsür, ta paisa ashi.
Iba ama meyimlaba temelenshi ajanga alima rangben nung tzü mopung mapang masüdang melenshidaktsür, ta pai shisem.