Pakistan nunger ka süngolio agi küm 25 taküm ali

Islamabad, April 22 (Agencies) : Pakistan Punjab province nung tebur ka kanga sensakba agi arem nung dang lia süngolio chia küm 25 tashi taküm liasü, ta Honibarnü osangbenertemi ashi.
Gujranwala district nungi Mehmood Butt ya mapa kecha maliasü aser pa ket nung chi auso ka alitsü den sen maliba ajanga süngolio achitsü tenzük. Ajisüaka kanga tesüngmangtsüka pa süngolio achi tenzüker külen temang nung shirangshiji kecha matalokdang, ta osang ajanga ashi.
“Ozü kibong kanga sensaker liasü. Tapu ajak nung ozü kanga timtema liasü aser ni chi auso ka dena malitetba jenjang nung liasü, anungji meshimetsüba dang nungibo süng achiba tajungba ta ni bilema aru,” ta Butt-i ashi.
Anungji khen pika yamaji aliba sülen ni mapa ngua chiyungtsü aliteta aküm, saka ni joko item chiyungtsü tajung achitsü balaka aküm kechiba süra ni süng aser süngolio achitsü yimya kanga junga sübateta kümer liasü, ta arishi küm 50 tain, Butt-i ashi.
Butt-i, akoh dong (Banyan), Tali aser Suck Chain süngtemji pai kanga sapua achir, ta ashi.
Butt-i pa gadu nung talongtsü alenloker oset belenshiba mapa nungi anogo nung Pakistan sen 600 aateter ajisüaka pai süngdongtem nung aliba süngo tou aser kongsangtem nunga tenük yoker, ta par kidanger kati ashi.
“Pai gadu talongtsüji mashi mapang ka nung anener lenmang tezülen aliba süngdongtem indang tou lanu peta achir,” ta par kidanger Ghulam Mohammad-i ashi.
Butt-i süngtou dang achiyonga temang anema dang aliba ngua iba tesem nung nisung ajungai pa kanga junga jangja lir.
“Pai taküm nung doctor dangi khen danga moudang mesüra mozüki nunga memungdang. Nisung kati süng aser süngotou dang achir ser nung koda sür meshiranger ta onoki kanga süngmanga bilemer, ta Mohammad-i shisem.