Pakistan nunger ketdangser itangiter ka dang India linük toktsür aotsü tuyuogo

New Delhi, October 27 (Agencies): Brihostibarnü India-i Pakistan High Commission nung staff ka dang ghonda 48 tsüngda linük toktsür aotsü tuyuogo.
India nunger anati Defense miim kakettem Pakistan’er ISI nem agütsüba putetba nungi Pakistan High Commission nung staff kati achayanga itangitba mapa inyakbaji jungkai adok.
Ministry of External Affairs otongdar, Vikas Swarup-i twitter ajanga ashiba agi, Foreign Secretary S. Jaishankar-i Pakistan High Commissioner, Abdul Basit jaoka pa dang Pakistan High Commission nung staff ka itangitba mapa inyaker ta sangdongogo, ta metetdaktsü.
Delhi Police-i Embassy ketdangser, Mehmood Akhtar, shibai Inter-Services Intelligence (ISI) atema inyaka liasü, pa apuba sülen Basit jaoka liasü.
“Akhtar dang mapang tatsüka asüngdangyaba sülen pa linük tsüngda inyaker ketdangser ka asübayong chiok,” ta Crime Branch nungi Joint Commissioner, Ravindra Yadav-i osangbenertem dang metetdaktsü.
Pakistan nunger Intelligence agency, ISI atema inyaktsüba asoshi India nunger ana- Maulana Ramzan aser Subhash Jangir na pua asüngdangyaogo, ta Yadav-i ashi.
Tenaprong Rajasthan nung alir aser police-i tena indang noksa-a sangdongogo.
Bodhbarnü par asemji Delhi Zoo nung apu. Ramzan aser Jangir naji Akhtar nem India nunger sepaitem arrtsüleni yokba indang miim osang agütsütsü atema Akthar ajurui aodang par asemprong apu.
“Parnoki defense, BSF (Border Security Force) sepaitem Rajasthan aser Gujarat nung arrtsüleni yokba osang meteter liasü aser tena ket nung India arrtsü positions indang map-a kar bena liasü,” ta Yadav-i ashi.
Yadav-i ashiba agi, tamalen Akhtar ya Pakistan Army 40 Baloch Regiment nung havildar inyaka liasü aser 2013 küm ISI-i pa hire asü.
Intelligence Bureau-i osang agütsüba nung ajemdaker parnok apu. Yaküm-a police-i ISI atema itangitba mapa inyaktsür nisung pongu apu.