Pakistan nunger tanur chanu ka samaba küm 2 lir India nung angu

Islamabad, May 29 (Agencies) : Khyber Pakhtunkhwa province nungi Tufail Ismail, arishi küm pongu asüdang June 2014 nung Charsadda district nung tsürbur den pilar mangu aliba nübur ajungtsü atema inyakertemi social media nung pa noksa inoktsüba sülen kinungertemi reprangteta India nung lir ta metet.
“Ozü jabaso arishi küm pongu asüdang Charsadda district nung June 2014 nung sama,” ta tebu Zafar Ali-i ashi.
Ismail’er kinunger rangbeni pa tesem ajaklen bushiogo aser pa sama’er tananü police nema metetdaktsü, ta tebui ashiba Deobarnü Dawn online osang ajanga metetdaktsü.
Ita ana tejakdang Saudi Arabia nung alir, Ismail tebu tanubui social media nung India nungi nübur ajungtsü atema inyaker kati pa noksa inoktsüba anguba sülen onoki pa Rajasthan nung aliba metet, ta tebu Zafar Ali-i ashi.
Iba tanubusang par kinungertem den ajurutepdaktsütsü mechi India nungi nübur ajungtsü atema inyaksang jagi Tufail Ismail noksa ka den tongteprateptsü atema telephone number-a ka inoktsür social media amshirtem dang iba noksa belenshitsü mepishi.
Iba telephone number nung Islamil tebu tanubui call asüdang pa Rajasthan police ket  nung kümzüka lir ta ashi.
Zafar-i, ozü jabaso Rajasthan nung lir ta meteter anogo 45 ajunger ajisüaka tang tashi pa Pakistan-i anir maruteter, ta ashi.
India aser Pakistan sorkar ajanga par jabaso kidangi meyipa anir arutsü par kibongi imlaseta atar.
Ismail’er tsüraburtemi Pakistan Ato Kilonser Nawaz Sharif aser India Ato Kilonser Narendra Modi na dang par jabaso Rajasthan nungi anir arua kidang parnok den tanaben longjemtsü atema yariang, ta temepishiba ka agütsüogo.