Pakistan nunger tebutsü tepsetsang taküm piyong tepuokdak ayutsü

London, July 18 (Agencies): Britain nung teti litettsü asoshi temelaba memeshitsüba ajanga Pakistan nunger kati tebutsü tepsetba ken o nung pa taküm piyong tepuokdak ayutsü obendang agütsüogo, ta Honibar nü media osang ka ajanga metetdaktsü.
Arishi küm 30 tain, Jamshaid Khan ya Britain nung teti atema litettsü temelaba angutsü meji nung Bulgaria tsür Milena Yulianova den kibong aküm, ajisüaka pai bilemba mataloktet, ta Guardian osang ajanga ashi.
Arishi küm 27, tebutsü Yulianova metsüngset dang, pa iba linük nung litettsü meji nung Khan-i ano Facebook nung Europe tsür ka bushitsü tenzükadoker liasü.
Yaküm January ita nung par ki ‘Forest Gate’ nung Khan-i Yulianova dak kotari agi 14 ben atsüng.
Ajisüaka pai tebütsü asaa tepset masü saka pa kümzüktsü meji nung pai kotari agi atsüng, ta ashi.
Aji oda süaka la dak kotari agi atsüngba zübo ajanga pa aitsüsa aküm.
“Nai tangar anisatsü tashi, o belenshitsü tashi aser tangar ashioktsütsü tashi asüba ajanga iba okadak obendang piyong nai onok anisatsü merangogo,” ta obendanger Stephen Kramer QC-i ashiba Guardian osang ajanga metetdaktsü.
“”Nai Milena ya tejashi nung tepset kechiba süra nai aginüba nung lai pumasem aser teyari magütsü,” ta Kramer-i shisem.
“Nena kibong kümer liaka, na yaritsü asoshi 2014 küm nai anüdoklen aliba Europe tsür ka den Facebook ajanga sensaksema liasü,” ta pai ashi.
Aji dang masü saka Khan yagi Facebook nung tetsür kar dangbo tebutsü gari tsükoka süogo, ta ashi. “Iba amala ya sensaksem yagi nü mulung nung nübutsü melendoktsü tebilemba aliba jangja-jangja sayur,” ta paisa ashi.
Khan ya tepuokdak ishiba agi küm 20 bosa alitsü.