Pakistan nungi kiralongrartemi Mumbai amak: Nawaz Sharif

Mumbai/New Delhi, Monupii 12 (Agencies): Taoba mapang Pakistan Ato kilonser, Nawaz Sharif-i yimjak nung, 26/11 Mumbai amakba nung Pakistan nungi kiralongrartemi shilem agia lir, ta nangzükogo.
Sharif-i, iba linük (Pakistan) nung kiralongrar teloktem kanga yakyaka inyaker ta ashiba den külemi “non-state actors” arrtsü adena odaktsür Mumbai nung nisung tepsetdaktsüba atema tasüngdangba kaogo, ta media osang ka ajanga metetdaktsü.
Panama Papers ken o dak sendakba nung Supreme Court-i Sharif-i nübur tenzükba office nung kodanga meinyaktsü atema obendang agüja liasü.
Mumbai amakba asalentong yanglusang, Hafiz Saeed aser Maulana Masood Azhar indang kiralongrar teloktem– Jamaat-ud-Dawah aser Jaish-e-Mohammad tenüng metetshii Sharif-i, “Pakistan nung kiralongrar teloktem yakyaka inyaker,” ta ashi.
“Parnok dang ‘non-state actors’ ajar, arrtsü adener Mumbai nung nisung 150 dak tema tepsetdaktsütsü atema asenoki kechiba temelaba agutsü? Ibaji kü dang rasa-a shiang. Kechiba iba ken o tembanga makar?” ta pai asüngdang.
Mumbai amakba dak sendakba ken otemji Rawalpindi nung aliba anti-terrorism court ka nung anendaka lir.
Sharif-isa, “Ibaji tagizüktetla masü (Non-state actors arrtsü adener tangalen kiralongradaktsüba). (Russia) Tir (Vladimir) Putin-ia ibaji jembiogo. (China) Tir Xi (Jinping)-ia jembiogo,” ta ashi.
Mumbai amakba ken o tenzüker küm 10 nung ayaokogo, ajisüaka tang tashi iba ken o nung Pakistan nung melung melemtetba nisung ka nem danga temerenshi magütsü, aser ibaji ajanga Pakistan-i iba ken o süoki ia magiba temaitsü sayur.
LeT kiralongrar 10-i Mumbai amakba mapang nung nisung 166 tepset, iba mapang nungjisa police-i parnok teku khaset aser tanüngba kiralongrar ka, Ajmal Kasab apuba sülen tasüba temerenshi obendang agüja alenseta südaktsüogo.