Pakistan PM-i Modi nem titi bener yok

Islamabad/New Delhi, July 22 (Agencies): Pakistan-India arrtsülen injang ola maneni liaka Pakistan Ato kilonser Nawas Sharrif-i Ato kilonser Narendra Modi nem titi bener yokogo.

Muslim nunger Eid benjung tenüng nung tawa Amritsar anasa Attari-Wagah joint check post nung India sepaitemi Pakistan sepaitem nem nanglong agütsü saka parnoki ibaji magizüki liasü, saka India den tesentaktep tajungba kümnüba temaitsü Pakistan-i India nem titi bener yokogo.

International arrtsü, Line of Control (LoC) nung Pakistan-i tanen makai ceasefire temzüng alema injang yokdagi saka Pakistan Ato kilonser Nawaz Sharif-i India Ato kilonser Narendra Modi nem titi ‘box’ ka bener yokogo.

Yaküm küm-a Sharif-i Modi aser Tir Pranab Mukherjee na nem titi bener yoka liasü. India-i linük ana tsüngda foreign secretary senden thinentsüba sülen titiji India tonga aru.

Taoba hopta Pakistan-i, nisung mamenba itdangitba tayimtsü ka parnoki kazüka yokbaji India nunger meyong lir, ta tai tonglokja liasü, ajisüaka Pakisatn asoshi tejashitsü osang kaji, kobi melii China nungeri iba tayimtsüji China nung yangluba tayimtsü lir ta osangkaket ajanga metetdaktsüogo.

India nunger indang nisung mamenba ‘itangitba’ tayimtsü kati temzüng alema litsü telungi aita LoC anasa anüngleni nungi noksa agiogo ta aija Pakistan-i Islamabad nung Foreign Office, India ketdangser jaoka liasü.

Ajisüaka Indian Army aser Air Force-ibo iba tayimtsüji parnok meyong masü aser LoC nung parnok indang tayimtsü metsükok mesüra kahzüka meyok, ta metetdakja liasü.