Pakistan PM, Khan-i PM Modi dang ken o jembitsü asüngdang

New Delhi, Rongjui/September 20 (Agencies): Pakistan nung Ato kilonser tasenba, Imran Khan-i shidi ka ajanga India Ato kilonser, Narendra Modi dang India-Pakistan ken o asentenshir jembitsü asüngdangogo, ta tanü Islamabad nung Foreign Office osang ka ajanga metetdaktsü.
Pakistan leniri Modi dang kiralongra aser Kashmir onük densema linük ana tesendaktep dak sendakba onük balala asentenshir jembitsü asüngdang.
Cricket asayar nungi yimtenren nung ajemoksang, Imran-i iba shidiji Rongjui/September 14, 2018 nü zülu, aser kasa shidi nung, tan ita New York nung UN General Assembly alidang Pakistan Foreign Minister Shah Mehmood Qureshi aser India External Affairs Minister, Sushma Swaraj na jurila senden ka mendaktsütsü atema asüngdanga lir.
Khan-i shidi ajanga Modi dang, “Asen linük ana tsüngda tangatettep nung yimjung alitsü atema SAARC foreign ministers senden jakdang New York nung UN General Assembly alidang ni Foreign Minister Makhdoom Shah Mahmood Qureshi aser External Affairs Minister Sushma Swaraj na senden ka mendaktsüner,” ta shia lir.
Taoba mapang Khan dang shidi ka ajanga Modi-i India-i Pakistan den tangatetba tajung nung ken o jembiner aser South Asia nung kiralongra malitsü atema longjemer inyakner, ta shia lir.
Pakistan’s Ministry of Foreign Affairs’ otongdar, Mohammad Faisal-i Twitter ajanga, “Ato kilonser (Imran Khan)-i tangatetba tajung nung Ato kilonser Modi nem telangzüba tajung agutsüogo. Asenoki ken o jembia mangatettep ajak bentetdi. Asenoki India dang nungi telangzüba atadi,” ta ashi.
Modi dangi züluba shidi nung Khan-i, “Linük nüburtem, talisa tarutsü pututem asoshi mangatettep onük ajak benteta ajak tajangzük angutsüji asenok teinyaktsü mapa lir. Item onük rongnung Jammu & Kashmir densema lir,” ta shia lir.
Pakistan Tehreek-e-Insaf (PTI) lenir, Khan-isa, minister anati (Qureshi aser Sushma Swaraj) tejakleni aotsüsa lenmang karbo ngutettsüa akok; Islamabad nung SAARC Summit ayongzüka aliba ajanga nenoki Pakistan semdangtsü maongka angutsü aser ken o jembiba asentenshitettsü, ta ashi.