Pakistan SC-i Lisopur jenjang ana bener alirtem mapa nung meshimtsü tetuyuba agütsü

Islamabad, Luchii/December 15 (Agencies): Pakistan Supreme Court-i Küptoknü federal aser provincial sorkar dang linük ana lisopur jenjang (dual nationalities) bener aliba civil servants tem dang parnok mapa toktsütsü mesera tanabuba lisopur jenjang toktsütsü atema tetuyuba agütsütsü asoshi tetuyuba agütsüogo.
SC-i sorkar dang linük kümzüka ayutsü atema linük ana lisopur jenjang bener aliba nisungtem national security dak sendakba mapa tem nung meshimoktsü atema mepeshia asüngdangogo.
Chief Justice Saqib Nisar lenisüba kübok nisung anati kümtetba Supreme Court bench kati-i, lisopur jenjang ana tashi bener aliba nisung tem lendong aketba mapa nung manioktsü aoshi Aenjeti ken o benokba asadanger telemtetba agüja liasü.
Okadaka ajanga obendang agütsüba nung, federal aser provincial sorkar dang linük ana indang lisopur jenjang bener alirtem mapa nungi agintsü asoshi jenjang tapet agitsü atema shia lir.
Kasa mapang nung sorkar kübok inyakertem dang atakzükja aliba mapang tashi nung lisopur jenjang tanabuba bendanga magütsüra temzüng ozüng kübok parnok anema jenjang tapet agitsü, ta amokmerenogo.
SC-isa, sorkar mapa inyaker shirnok mapa nung shimba mapang bendang lima lisopur jenjang bener liasü parnok ya linük tejangrabatem asoshi lendong keta lir, ta ashi.
Ajisüaka okadak ajanga lenmang ka lapoktsüogo, kong Pakistan nunger masürtem Cabinet temelaba agir maneni pei mapa inyaktettsü.
Metsüremi/March nung sorkari osang bendenba ajanga federal aser provincial sorkar kübok ketdangser parnok 213 linük ana indang lisopur jenjang bener aliba sayuogo.