Pakistan sepaitemi Afghanistan nung aliba kiralongrar teseptem amak

Islamabad, February 18 (Agencies) : Hokolbar aonung Pakistan security force temi Afghanistan nung aliba Jamaat-ul Ahrar kiralongrar teseptem amak. Parnoki item telungpur indang tesep pezü aser training agiba tesem ka ta maktokogo, ta Honibarnü osang ajanga metetdaktsü.
Pakistan sepaitemi Afghanistan Embassy nung ketdangsertem Rawalpindi nung aliba Army Headquarters nung jaoka Afghanistan nung atsükoka aliba kiralongrar tenüng 76 tashi züludener agütsüba sülen gondha ishika lir parnoki item teseptem amak.
Pakistan military mesüra sorkari item teseptem amakba osang tejangja kecha memetetdaktsü, ajisüaka army temi Khyber aser Mohmand arrtsülen aliba Jamaat-ul Ahrar telok aliba tesemtem nükjidong yur inyaker, ta osangkaket nung shia lir.
Brihostibarnü Sindh province kübok Sehwan jila nung Shahbaz Qalander amakbaji Pakistan-i Jamaat-ul Ahrar telungpur dak tai tonglokja lir. Iba lendong nung nisung 83 asü aser nisung 250 shi yiru.
Osangkakettem nung ashiba agi, tang sepaitemi amakba telungpur teseptemji linük ana tsüngda arrtsülen arokaba aliba tesem nung liasü.
Iba amakba mapang Jamaat-ul Ahrar telok nung deputy commander Adil Bacha dena telungpur züngsem aika tepsetogo, ta osangtem ajanga metetdaktsü.
Hokolbarnü Pakistan Army chief General Qamar Javed Bajwa-i Afghanistan nung Commander of Resolute Support Mission (RSM), US General John Nicholson den phone ajanga jembiba mapang, Afghanistan nungi Pakistan nung kiralongra mapa inyakba tebilemtsü lemsaa liasü.
“Pakistan nung lendong atalokba timba ka Afghanistan nung aliba kiralongrartemi tenüng agir,” ta Bajwa-i Nicholson dang ashiba Inter-Services Public Relations (ISPR) sangdong ka ajanga metetdaktsü.
“Iba ama inyakba ajanga onoki arrtsülen rara adokba nungi jenbua alitsü merangba mapa nung tamakok aludaktsür,” ta Bajwa-i ashi.
Hopta tsüngda Pakistan rangben nung kiralongrartemi nisung 100 dak tema tepsetba sülen linük security force temi kiralongrartem ajak amaktsü sentong yangluogo.
Brihostibar aonung nungi security temia kiralongrartem parnok nisung 100 dak tema tepsetogo.
Linük nung security tebilemtsü aliba ajanga Pakistan-i Torkham arrtsülen shibanga yuogo aser iba den külemi Afghanistan den arrtsü tesem tanga kar dena shibanga lir.