Pakistan Taliban den onok maden: Afghanistan Taliban

Islamabad, Oct 23 (Agensies): Afghanistan Taliban-i, Osang kar ajanga Afghanistan Taliban teloki Tehreek-e-Taliban Pakistan (TTP) den loktepogo ta sangdongbaji teyazü osang, ta ashiba mapang parnoki Afghanistan Taliban-i bendang linük lokti balala inyakyim den tesendaktep mayur, ta shisem.

Tehreek-e-Taliban Pakistan-i email ajanga media dang Afghanistan Taliban den lungjemogo ta sangdongba nung naia kechi ashir, ta asüngdangba mapang Afghanistan Taliban nung otongdar Zabihullah Mujahid-i, Afghanistan Taliban-i bendanglen aliba lokti balala inyakyim nung mamoker mesüra lokteper meinyaker, saka onok sasep nung teinyaktsütem inyaker, ta Brihostibar nü ashiba Geo.tv ajanga metetdaktsüogo.

Iba email ji Tehreek-e-Taliban Pakistan nung otongdar Maulana Fazlullah-led-i yokba lir. Maulana-i media dangi yokba email rongnung ibai mezüng lir aser iba email ya shitakba pai asü tangari yokar ta kanga mangmangtepa liasü.

Mohammad Khorasani-i yokba email nung Tehreek-e-Taliban Pakistan aser Afghanistan Taliban nung lennirtemi telok ana külemi lungjemer inyaktsü aser training-a külemi agitsü lemtetogo, ta shia lir.

Tesüiba mapang Afghanistan Taliban nung lennir Mullah Omar July ita nung melenzüksang, lennir tasenba, Mullah Akhtar Mansour-i tan ashiba nung Maulana Fazlullah-i aniba Tehreek-e-Taliban Pakistan teloki ano kecha melangzüi lir.