Pakistan tayimtsü nung nisung 47 tsükset; tasümang 21 nguogo

Karachi/Peshawar (Pakistan), December 07 (Agencies): Bodhbar nikongdang Pakistan International Airlines (PIA) tayimtsü ka Chitral nungi Islamabad yimtii aodang Abbottabad district anasa Havelian tesem nung tsükokogo.
Passenger tayimtsü PK-661 nungji 1990s mapang rock kentener aliba nungi Islamic sayutsüngir akümsang, Junaid Jamshed den pa kinungtsü aser Chitral Deputy Commissioner, Osama Warraich nunger densema passenger 47 liasü.
Jamshed ji sayutsüngitsü atema Chitral-i aoba liasü, ta par adianu kati ashi.
Tayimtsü nung mena alir ajakji süogo, ta bilemer.
Nikongdang 3:00 ako meta tayimtsüji Chitral nungi apusoa liasü saka nikongdang 4:30 ako meta control tower den tongtepratep raksa.
Iba osang metetdakja PIA otongdar, Daniyal Gilani-i, “PIA indang ATR-42 tayimtsü, PK-661 nungji nisung 40 shi mener Chitral nungi Islamabad-i aoba mapang Control tower den tongtepratep mekakteti aküm,” ta metetdaktsü.
Ano külen PIA otongdar tangar kari, iba tayimtsü nung pilot jagi timtem ajuruba osang traffic control nem metetdaktsüba sülen tongtepratep mesüteti aküm, ta ashi.
Paisa, “ATR tayimtsü nungji tetsür teku, kinü tanur ana, airhostess ana aser pilot asem den passenger 42 liasü,” ta ashi.
Ano Peshawar nungi tanga osang ka ajanga ashiba agi, tayimtsü tsükokba tesem nungji tang tashi nung tasümang 21 ngutetogo.
Kümzükba maparen inyaker sepaitemi sangdong ka ajanga, “Kümzükba maparen maneni inyakdar. Tang tashi nung tasümang 21 nguetogo,” ta metetdaktsü.
Lendong atalokba tesem nungsa sorkar ketdangser kati, PIA tayimtsü nung mena alir shinga mekümzük südi, ta ashi.
Havelian nung sorkar ketdangser, Taj Muhammad Khan-i, “Tasümangtemji maitsü mejangjatettsüsa rongsaogo. Tayimtsü tejaksaji prokshia lir,” ta asi.
Tenük kuli alirtemi ashiba nung ajemdaker Khan-i, “Tayimtsüji tenem aliba tesem nung tsükok, aser tayimtsüji ali nung metsükokdang yongi mi adoka liasü,” ta ashi.
Civil Aviation Authority (CAA)-i tayimtsü nungji nisung 47 liasü ta ashi, ajisüaka Chitral nung PIA ketdangser katibo, tayimtsü nungji nisung 41 liasü, ta metetdaktsü.