Pakistan’er bushisüngdangba teloki Pathankot nung IAF base semdang

Pathankot, March 29 (Agencies): Mongolbarnü Pakistan nunger züngsem pongui akümba Joint Investigation Team (JIT) den India nunger ketdangsertemi, taküm January 2, 2016 nü kiralogrartemi amakba tesem, Pathankot airbase semdangogo.

Pathankot nung IAF base amakba bushisüngdangtsü atema Pakistan nungi JIT züngsemtem bus ka nung airbase kishilen ajanga dang anir ao, kechiyong Congress aser Aam Aadmi Party (AAP) züngsemtemi ibaji anema lungkak aita liasü.

Punjab additional inspector general of police, counter-terrorism department, Muhammad Tahir Rai lenisüba nung JIT züngsemtem tanep Amritsar nung Sri Guru Ramdas international airport tonga aruba sülen gari ajanga Pathankot-i oa liasü.

Punjab Police SWAT densema securtity sepaitem Pakistan telok nem security takang agüja liasü.

Ketdangsertemi ashiba agi, IAF base amaktsü atema kiralongrartem atsüka aitba tesemji tanü JIT züngsemtemi semdangogo.

January 2 nü kiralongrartem aser sepaitem tsüngda ghonda 80 dak tema kahtepdang kiralongrar pezü aser security sepai tenet tepseta liasü.

Pathankot semdangtsü atema Pakistan telok nem temelaba agütsüba anema lungkak aitertemi IAF base kima yimyim ayima liasü.

AAP aser Congress nungi lungkak aitertemi, India nunger litsü nung kiralongraba ken o Pakistan telok nem India nung bushisüngdangdaktsüba ajanga BJP-i aniba sorkari India nunger melung yirutsüogo, ta aitsür.

AAP lenir aser Delhi minister, Kapil Mishra-a Pathankot nung liasü aser pai, Airbase semdangtsü atema Pakistan nunger JIT nem temelaba agütsübaji taaktsüka aser tejashitsüka lir, ta ashi.

“Tesüiba küm 35 nung tang mezüng asenoki, ISI (Pakistan Intelligence agency)-i kiralongraba pu masemer ta jembir. Asen nübur tepseter kasa nisungtem yagi arua lir. Iba ya taaktsüka aser tejashitsüka lir,” ta Mishra-i ashi.

Muhammad Tahir Rai dak alia Pakistan nunger JIT züngsemtem rongnung- ISI nungi Lt Col rank officer, Tanvir Ahmed, Lahore deputy director general Intelligence Bureau, Mohammad Azim Arshad, Military Intelligence Lt Col Irfan Mirza aser Gujaranwala CTD investigating officer, Shahid Tanver nunger densema lir.

Yashi Delhi nung India aser Pakistan naprongla nungi bushisüngdangertem külemi senden ka mena liasü. Kiralongraba ken o bushisüngdangtsü atema Pakistan-i tang India semdangba ya tang mezüng asütsü.

Yashi Delhi chief minister, Arvind Kejriwal-ia, kiralongrartemi IAF base amakba ken o India nung bushisüngdangtsü atema Pakistan linük nem temelaba agütsüba ajanga Ato kilonser, Narendra Modi-i Pakistan matsüngdang apudakogo, ta aija liasü.

Paisa, kechiba parnoki senotsü agi yaria kiralongraba bushisüngdangtsü atema par security aser intelligence ketdangsertem nem temelaba agütsür(?) ta asüngdang.

Congress Party den külemi opposition party temia, JIT telok ‘red carpet’ nung agizükbaji ajanga süoki ia agitsü tasüngdangbatem arur; Linük lendongi aitsüsa meinyaktsüla, ta aitsüogo.