Pakistan:Transgender tema netsüngsük nung dendaktsütsü

Islamabad, January 09 (Agencies) : Pakistan otsü nung tan mezüngsüa linük nung aliba transgender tem-a linük netsüng yongsük rongi aitdaktsütsü, ta Hombarnü Okadak kati tetuyuba agütsüogo.
Transgender rongnung ka, Waqar Ali-i November 2016 nung benokba temepishiba ka angadangdang Lahore High Court-i National Database & Registration Authority (Nadra), federal sorkar aser Interior Ministry dang transgender teloka linük netsüng yongsük nung dendakjang ta tetuyuba agütsü.
Ali-i züluba shidi nungji taruba census nungbo parnoka linük temzüng nung aliba ama linük züngsem nung züngoker identy card nung parnok tetsür aser tebur ibaji tejangja zülur agüjang ta zülua lir.
Okadak iba o angadangba mapang densema alisang Federal sorkar nungi deputy attorney general kati taruba mapang census nung transgender tema linük netsüng yongsük nung züngoktsü ta okadak metetdaktsü.
Ali-i züluba shidi nungji transgender tem nübur ajaki züngdoker, tesüiba mapang nunga Sialkot nung transgender ka rishi kangshiba asenoki metetogo, ta zülua lir.
Pakistan nung 6buba census March 15, 2017 nü nungi tenzüka zülutsü.