Palestine-i par wako UN nung metongtsü temeten angur

United Nations, September 11 (Agencies): Palestine-i par linük wako United Nations (UN) nung metongtsü temeten yashi Brehostibar nü nguogo.

Yashi UN General Assembly senden amendang senden nung shilem agir lenir 127 rong nungi parnok nisung 119 tashi UN nung mezüngsemaka, UN den observer linük ka ama sentaktepba Palestine-i par wako UN tesepti aser par kongsang office-tem nung metongtsü temeten agütsütsü onük agizüka liasü.

Tanü tashi Palestine aser Vatican na dang UN nung mezüngsemba observer linük aliba osang bushiteta lir.

“Tan telemtetba agiba ya ozü Palestine’er nüchiso angutsü alizüng tsütsüleni tongti mera ka agir lir,” ta Palestine Ambassador, Riyad Mansour-ia tanü metetdaktsü.

Tashishitsü ken o aketba onük ya alima linük 50 dak temai pusema benokba sülen UN-i Palestine nem par wako UN nung metongtsü temeten ya tan agütsür lir.

“Taoba mapang inyaka aruba maparen melenshitsüsa Palestine-i inyaka mali,” ta shia, UN-i tan Palestine nem par wako metongtsü temeten agütsübaji UN-i taoba küm 70 tashi UN nung züngsemba linüktem nem dang pei wako UN nung metongtsü temeten agütsübaren melenshir lir ta UN nung züngsemba linük aikati metetdaktsüogo.

Ano külen, “UN-i temeten agüja aka, ozü Vatican-i ozü wako UN nung metongtsü tebilemba mali,” ta taoba mapang, 1964 küm nungi tenzüka observer linük jenjang abenba Vatican ketdangser, Papal Nuncio Bernardito Auza-i metetdaktsüba osang jangjaogo.

Palestine-i 1974 küm nungi tenzüka UN General Assembly den sentaktepa aruba sülen, par linüka observer linük ka akümtsü telemtetba 2012 küm agia liasü.

Ano külen, Palestine nem par wako UN nung metongtsü temeten agüja aka, iba jagi Palestine nem tanga temeten magütsütsü ta Isreal ambassador, Ron Prosor-ia metetdaktsüogo.