Jerusalem, June 27 (Agencies): Kiralongrartemi lendong matalokdaktsütsüsa parnok anema tasüita nokdaktsü tajungshiba olen ka United Nations (UN) Secretary General, Ban Ki-moon-i Israel aser Palestine lenirtem dang tanü, Hombar nü metetdaktsüogo.
Middle East semdangtsüren tenzüka, Ban-i Jerusalem yimti tanü tonga aoba sülen pai iba olenji sangoktsü.
“Israel aser Palestine lenirtemi lendong atalokdaktsür anema tasüita nokdaktsü ajungshir. Yamaji inyakba ajangda dang nüburtem tia junga alitsü aser linük anaprong nung terenlok alitsü,” ta pai ashi.
“Kotari agi nisung tsüngsetba, bomb pokdaktsüba aser injang yoka lendong atalokdaktsüba ajanga tebentetbaren kodanga bener marutsütettsü,” ta Ban-i Israel Tir, Reuven Rivlen den ajurutepa lemsatepa liasü.
Yashi, Deobar nü Kuwait semdanga Middle East semdangtsü tenzüksang, Ban-i Israel Ato Kilonser, Benjamin Netanyahu dena asüng, Mongolbar nü ajurutepa senden amentsü sentong renema lir.
Ban-i asüngsa, mangatettep adokdak, Gaza Strip semdanga idakji UN-i tenteta ketdang asüba tetsür primary school ka semdangba sülen maneni West Bank kübok Ramallah semdanga, Palestine Tir, Mahmud Abbas aser Ato Kilonser, Rami Hamdallah na den senden amentsü renemogo.
You must be logged in to post a comment Login