Palestine mosque tem nung loudspeaker nokdangba atema Israel aitsür

Ramallah/Gaza, February 13 (Agencies) : Israel-i Yirusalem aser Israel na nung aonung sarasadem jazükba mapang loudspeaker tem amshiba nokdangtsü bill benokba agi Palestine nunger kanga mepelar.
Deobarnü sarasademtsü ayongertem (Muezzin) atema bill tasen ka benokba ajanga mosque tem nung aonung 11:00 ako nungi anepdang 7:00 ako tashi loudspeaker tem amshitsü memelar, ta osangbenertemi ashi.
Palestine Tir Mahmoud Abbas-i, iba inyakyim ajanga takoksa tulu bener arutsü, ta bill aija jembidang ashi.
Annas-i Arab aser Muslim teloktem dang iba bill anema apusotsü ayongzükogo, ta Palestine National Authority (PNA) sangdong ka ajanga metetdaktsü.
Palestine nung Waqf & Religious Affairs kilonser, Yousif Idais-i, parnoki iba bill benokba ajanga linük ana tsüngda mangatettep aliba ya tamangba yimsü tebilemtsü kümdaktsütsü atema benokba lir, ta ashi.
“Iba yagi yimtenren dak alaka ano tamangba yimsü anema inyakba sayur aser tamangba yimsü nokdangtsü meranger,” ta Idais-i ashi.
Iba bill ya ajanga tesem rangben nung tamangba yimsü balala tsüngda rara adokdaktsütsü,” ta pai ashi.
Israel aser Palestine linüktem nung mosque noklang aika lir aser item mosque tem nung anogo shia pungu ben sarasadem ayonger. Mezüngbuba sarasadem ayongbaji anü madokdang agir.
Iba bill ya Israel parliament (Knesset) nung right-wing nungi Habayit Hayehudi aser Likud züngsemtemi nungiter.
Parnoki anepongi loudspeaker tem amshia sarassademba ajanga Yihuda aser Arab nunger nisung meyirjang aika mejang raksatsür, ta ashi.
Israel Ato Kilonser Benjamin Netanyahu-i iba bill agizüka mapa kümdaktsü aser pai, sarasademtsü ayongertemi (muezzin) loudspeaker tem amshia sarasadem ayongba ola tulu agi timtem agütsüba tamangba yimsü balala amangertemi mezüngdangtetben shiogo, ta ashi.
PNA atema otongdar Yousif al-Mahmoud-i, “Iba bill benokba ajanga Yirusalem nung tamangertem nüji raksatsür,” ta ashi.
“Kalam (Pen) agi khen asüba ajanga alemli nungi yimti nung benshia aruba tamangba yimya aser otsü tejen aidoktsüji mamangteter,” ta al-Mahmoud-i ashi.
“Palestine nung balaka parnok tamangba yimsü kanga reta amshitetba ajanga parnok akhümtsübu angur aser ka o ka na putepa alir,” ta otongdari ashi.
Abbas nung tamangba yimsü tsütsü Mahmoud al-Habbash shisa tuyur Mahmoud al-Habbash-i, Israel-i Palestine den maneni toktepnüba ajanga parnoki alimai mulungba aser international ozüng nung nüburtem asoshi tamangba nüji latetja aliba anema inyaker ka akümer, ta ashi.
“Alima temzüngtem ajak nung pei tamangba yimsü tenokdangba kecha melii sadoka amangtsü mela lir,” ta otongdarisa ashi.
“2007 küm nungi Gaza Strip nung Islamic Hamas movement tenzük aser ano tang iba bill agizükba ajanga tesem nung meputep taliang adokdaktsütsü,” ta Hamas otongdar jagi ashi.
Israel radio ajanga ashiba agi, iba bill ya ozüng akümtsü aser iba ozüngji Yirusalem anodoklen aser Israel na nunga amshitsü, ajisüaka tensa mejungi aliba Al-Aqsa mosque compound nungbo iba ozüng mamshitsü.
Al-Aqsa ya Yirusalem yimti tejenba nung Islam pur atema temeshitiba tesem rongnung tasembuba lir.