Palestine nüburtemi asür Aylan Kurdi nem aküm agütsür

Syria tongpang nungi jenboa Europe nung jenoktsü merangdang tzüyim nung arükseta asüba Syria nunger arishi küm 3 tain tebur chanu, asür Aylan Kurdi (Noksa achijilen) ama Rabat yimti tzüyimkümlen lisem nung mejanga Morocco nüburtemi asür Kurdi nem aküm agütsüba noksa nung angur. (Rabat, September 08)

 Gaza City, September 08 (Agencies): Palestine nüburtemi tawa Turkey tsüyimkümlen tzüyim nung arükseta asür Syria nunger Kurd kin tebur chanu, asür Aylan Kurdi nem Gaza Strip tzüyimküm nung aküm agütsüogo.

Syria nung tongpang kanga sashia rara tensa mejungi akümba nungi taküm kümzüka Europe nung jenoka alitsü asoshi tsürapur aser tenu na den apusosang, Kurdi-i tetsü aser tenu na den rubber agi yangluba rong ka nung mener Greece bushia aodang rongji tzüyim nung meküboka par asemprongla Turkey tzüyimkümlen arükseta asüba osang bushitetogo.

Aji oda, Palestine nüburtemi Kurdi kürakyanglu ka lisem agi yanglua pa nem tanü aküm agüja liasü.

Kurdi taoba hopta tzüyim nung arükseta asüba sülen tzüyimkümi punger adoka tzüyimküm nung zükdaka aliba ama tanü kürakyangluji yangluba osanga jangjaogo.

Kurdi indang tasümangji Turkey nung tentetba tongti raliwalirtem kazükdak, Bodrum tzüyimküm tonga tzü agi punger adok aser noksa tangokertemi tasümang noksaji agir alima ajunga nung prokshiba sülen alima ajunga kanga dang aoksa temulung shirangba osang jangjaogo.

Ano külen, Morocco nübur 30 shi par linük yimtiba, Rabat tzüyimkümlena asür Kurdi-i asemba süoshi mesükba sübotsü semer lisem nung Kurdi ama minute 20 shi mejanga pa nem aküm agütsüba osang jangjaogo.

Tang Europe-i ajurushia aliba pei linük toktsür Europe nung jenoka alitsü merangba migrant-tem den sentakba khuret lemsatepa abentsü nükjidong nung par Venezuela nung Syria nunger refugee 20,000 shi jenoka lidaktsütsü lemtetba osang ka Venezuela Tir, Nicolas Maduro-ia tanü metetdaktsü.

“Ozü linüki kümshi refugee 500,000 tashi ozü linük nung taruba küm 7 tashi jenoka lidaktsütettsü,” ta Germany Vice Chancellor, Sigmar Gabriel-ia tanü sangoktsüogo.