Palestine nung lenmang ka India nüngtem nung jatsüogo

Ramallah, October 12 (Agencies): Tang mezüng India Tir kati Palestine linük semdangsang, Tir Pranab Mukherjee Palestine nung aliba mapang Ramallah nung tongtibang lenmang ka India nüngtem nung jaloktsüogo.

Ramallah nung lenmang Sharia-e-Al-hind (India lenmang) aser Midan-e-Al-hind (India roundabout) India nüngtem nung jaloktsüba sentong nung Tir, Mukherjee aser Palestine Tir, Mahmoud Abbas dena liasü.
Mahatma Gandhi Road den anasatepa aliba lenmang tasen ka mapang talangka tenüng magütsüi liasü aser Palestine ketdangser kati, iba lenmang tenüngji Mukherjee nüng jaloktsür, kechiyong pai Palestine semdangba ajanga linük ana tsüngda tesentaktep tajung aliba kuli sayur, ta ashi.
“India Tir-i semdangba ya New Delhi nungi tongtiba ketdangser kati Palestine semdanger lir, aser iba ya puti otsüsütsü mapang ka lir aser tenüng jaloktsüba aser lapoktsüba ajanga puti otsü ka yanglur,” ta Beitunia municipality ketdanger, Yazan-i ashi.
Roundabout sabang nung lotus naro mesüka yanglubaji India nunger Linük naro temulung nung yur yanglu, ta paisa ashi.
Tanü Tir Pranab-i Israel linük nungi Palestine litsüi aiba ajanga otsü tasen ka yanglu.
Ramallah nung aliba airport ji flight operation atema temsüa maliba ajanga Tir Pranab-i Tel Aviv nungi Ramallah-i gari ajanga dang aotsüsa aküm.
Amman nungi Mukherjee Israel nung Ben-Gurion airport tashi ao aser Palestinian Authority (PA) tesemi ao.
Pai Mongolbar nü nungi tenzüka anogo asemnü Israel semdangba mapang Israel Ato kilonser Benjamin Nethanyahu aser Tir na den ajurutsü.