Palestine nunger longkak aitertemi Joseph leper rongdoktsü

Palestine nunger longkak aiter telok kati West Bank kübok Nablus yimti nung Yihuda nungeri renemba Joseph leper nung yasüng, Brehostibar aonung mi senoktsüba sülen mi kanga sashia jangruba noksa nung angur. (Nablus, October 16)

 Nablus, October 16 (Agencies): Palestine nunger longkak aiter telok kati West Bank kübok Nablus yimti nung Yihuda nungeri renemba Joseph leper yasüng, Brehostibar aonung rongdokja tensa mejungi kümdaktsüba osang ka sorkar ketdangsertemi tanü Hokolbar nü metetdaktsüogo.

Israel nüburtem amakba maparen azüoktsü tajungshiba olen ka Israel Ato Kilonser, Benjamin Netanyahu-i Palestine Tir, Mahmoud Abbas dang metetdaktsür ghonda ishika lir külen Palestine nunger lokti Yihuda nungeri semdanga par sarasadem mapang agidakji kanga mejungi rongsaja liasü.

Palestine nungertemi petrol bomb amshia leperji rongdoktsütsü tenzük saka Israel mitkartemi lendong atalokdaktsüdak tonga aoba jakdang Palestine police ketdangsertemi lendong atalokdaktsürtemi meindokba sülen par firefighter ketdangsertemi miji remseptsüba osang jangjaogo.

Abbas-ia Yihuda nungeri temeshi tesem ta züngshidak rongsatsürtem aitsüba den külemi, leperji tanaben yanglushitsütsü tenangzükba olen ka metetdaktsüogo.

Ano, Israel-i agia aliba West Bank nung osangkaket atema noksa agir ka ama sayuba sülen Palestine nunger kati Israel mitkar züngsem ka kotari agi tanü Hokolbar nü yirutsüba osang ka Israel mitkar otongdar, Lt Col Peter Lerner-i metetdaktsü.

“Kiryat Arba nung ozü mitkar züngsem yirutsüsangji ozü mitkartemi kasetogo,” ta pai shisem.

Tan October ita tetenzüklen nungi tenzüka Israel aser Palestine nübur na tsüngda anogoshi ama raratepa par linük ana tsüngda tang tensa kanga mejungi kümdaktsüba osang bushiteta lir.

Tan ita tenzüker tanü tashi nung Israel nunger 7 tepsetba aser parnok 10 dak tema kotari aser injang agi yirutsüba aser Palestine nüburtema nisung 30 shi tepsetba osang bushitetogo.

Ano külen, Israel aser Palestine na tsüngda tensa mejungi akümbaren azüoktsü onük benoka jembiteptsü nükjidong nung United Nations Security Council senden ka tanü jatepa amenba osanga angazükogo.