Palestine tsür tesayur kati Global Teacher Prize agizükogo

Dubai, March 14 (Agencies): Palestine tsür primary school tesayur kati dollar sen million 1 senpet sen densemba 2016 Global Teacher Prize yashi, Deobar nü agizükogo.
Hanan al-Hroub-i alima ajunga nungi tesayur 8000 den temaba jenjang ngua iba sempetji United Arab Emirates (UAE) kübok Dubai yimti nung agizüka liasü.
Alima ajunga nung tesayur tajungtiba shima agütsüba Global Teacher Prize ya taküm agi tanabenbuba agütsür lir.
Refugee camp nung lia inteter, Hanan ya West Bank kübok al-Bireh yimti nung tentetba primary school ka tesayur lir aser lai kaketshirtem dang kaket tesayuba den yimjung maparen ajanga pei alizüng ajangzüktsü sayuba osang angazükogo.
Alima ajunga nung Roman Catholic tamangba yimsü benshir lenisang, Pope Francis-i video osang ka ajanga tongpang raraba tesemtem nung alir tila tanurtem asoshi tesayur tajung alitsü kanga dang tongtipang aliba olen ka lemsatepa, Hanan Global Teacher Prize agütsütsü asoshi shimba osang sangoktsü.
Tesülen, Dubai nung Emir, Sheikh Mohammed bin Rashid Al Maktoum-i iba sempetji Hanan nem amoktsü.
“Tan agizükba senpet senji takok tajung ngua tarutsü mapang nung tesayur akümtsü nükla ayur kaketshirtem jenjang tajungba kümdaktsütsü maparen nung amshitsü renema lir,” ta Hanan-ia sempet/senpet agizükba sülen metetdaktsü.
Tangar dak alia tajungba sayuba den külemi, tarutsü mapang nung tesayur akümtsüsa kaketshirtem ajungmesor tesayur shima, iba Global Teacher Prize ya küm 2 tejaklen nungi agütsütsü tenzük.
Iba sempet agütsütsü sentong ya Varkey GEMS Foundation tentetsang, Sunny Varkey-i Dubai nung ayonga agiba Global Education & Skills Forum nung tenzükja liasü.