Palestine ya nüchiso anguba linük ka akumtsü imlar: PM Modi

New Delhi, Tsüklai 10 (Agencies): Honibarnü India nunger Ato kilonser kati Palestine mezüng semdangba lenirji Narendra Modi kümogo.
India aser Palestine tesendaktep yangluba nung shilem tajung agiba atema tanü Palestine Tir, Mahmoud Abbas-i pa nem ‘Grand Collar of the State of Palestine’ agüja liasü.
Pa nem tetushi agutsüdang Ato kilonser, Modi-i, “Iba ya India atema akhümaket ka lir aser Palestine den medemer yimtepba temaitsü ka lir. India nunger ajak tenüng nung ni nü dang pelar,” ta ashi.
Tsüklai 9 nungi tenzüka Tsüklai 12 tashi pai linük asem semdangtsü atema apusoa liasü, aser tanü pa Jordan ajanga Palestine yimtiba, Ramallah tonga aru.
Senden amenba sülen Modi aser Palestine Tir, Abbas nati tezüngzüktep aika agi aser tenati külem sangdong ka metetdaktsü.
Onük jembidang Modi-i, “Yimjung lenmang ajanga kobi melii Palestine ya nüchiso anguba linük ka akumtsü, ta India-i imlar,” ta ashi.
Paisa, “Palestine nung yimjung atema onoki imlar aser ken o jembiba junga tembangtsü imlar. Yimtenren inyakyim aser mangdang tajung aliba ajanga dang rara malitsü,” ta metetdaktsü.
India atema Palestine ya foreign partner ka asütsü, ta shia Modi-i, “India aser Palestine na akhidang nungi tesendaktep junga lir. Onok indang foreign policy nung Palestine temaba jenjang nung lir,” ta metetdaktsü.
Modi-i Palestine semdangba mapang nung Palestine sorkar den tezüngzüktep aika agiogo aser diplomacy, shisaliok nung partnership yangluba den külemi Palestine nüburtem atema inyaktsü, ta nangzükogo.
Tawa New Delhi nung Modi-i Israel Ato kilonser, Benjamin Netanyahu agizükba sülen ita ka lir tang pai Palestine semdangogo.