Paliamentary Secretary S.Chuba Lkr-i yipru agi ki raksatsürtem semdang

Mokokchung, May 03 (TYO) : Tanü Veterinary  & Animal Husbandary Parliamentary Secretary  S.Chuba Lkr aser pa kinüngtsü  tenati April 30 aonung yipru mopung  tulu agi Chuchuyimlang town nung ki mejungi raksatsüba semdanga parnok ki kibur nem teyari terara agütsüogo.
Osangzülurtem den jembidang pai  ajungben yipru mopung tesashi arubaji Tsüngremer sentong ta angatettsüla, kechiaser iba ama tatalokba ya memetetba mapang nung arur, anungji iba ama tensa ajurudang aser tepettep makamait tia nung nüburtem temulung atangtsü nüngdaker aser Tsüngrem bushitsü kanga tongtipang, ta  S.Chuba Lkr-i ashi.
Parliamentary Secretary-isa, iba ama timtem ajuruba mapang nungya nüburtemi timtembapur yaritsüla, ta shisem.
Chuchuyimlang town nung ki kanga mejungi raksabaji 44 aser terara raksabaji 62 liasü.