Palmyra: Khen nung tasümang jenti aremdak tasümang 42 angu

Palmyra, April 02 (Agencies): Syria sorkar mitkartemi tawa Islamic State (IS) kiralongrar telok ket nungi tanaben agishiba Palmyra yimti nung khen nung tasümang jenti aremdak ka bushitetba osang ka mitkar lenirtemi tanü, Honibar nü metetdaktsüogo.
“Ozü mitkartemi Palmyra yimti nung khen nung tasümang jenti aremba leper ka nguogo. Iba leper nung Syria sorkar pusemer popular committee lenir, sepai aser züngsemtem aremba osang bushitetogo,” ta parnok tenüng memetetdaktsütsü nangzüktepba sülen mitkar lenirtemi metetdaktsü.
Parnokisa ashiba agi, tila tanur 3 desema, tasümang 24 tashi nüburtem aliba osanga bushitetogo.
“Tan anguba tasümangtemji IS teloki tekong tangja mesüra injang agi kaseta tepsetertem lir,” ta shia, yashi tutetba tasümangtemji Homs yimti tonga bener aoba osang parnokisa metetdaktsü.
IS teloki tawa Brussels aser Paris na nung lendong atalokdaktsüba atema tenüng agia metetdakja aka, par teloki Syria aser Iraq na nungbo tamakok angutsü tenzüka lir.
Russia mitkar tayimtsütem nungi teyari agia, Tir Bashar al-Assad-i aniba Syria mitkartemi Palmyra aser idakji tentetba UNESCO World Heritage Site IS ket nungi taoba Deobar nü tanaben agia liasü.
IS teloki Palmyra yimti ya 2015 küm May ita tashiyim agi agia par tongti tesep ka kümdaktsü.
Par teloki ita 10 shi Palmyra par tesep ama amshidang idakji nisung 280 shi tepsetba osang bushitetba osang ka Britain nung tenteta Syrian Observatory for Human Rights (SOHR) tentetia metetdaktsüogo.
Syria mitkartemi Palmyra tanaben agir hopta ka shi tsüngda nung tanga tesem nung jenoka alir Palymra senso 70,000 shi par Palymra-i tanaben shilangba osanga jangjaogo.
Küm 5 tejaklen nungi tenzüka, Syria nung mangatettep tulu adoka tongpang raraba ajanga tanü tashi nung ishiba agi nisung 270,000 shi asüba osang bushiteta lir.
Ano külen, Syria mitkartemi Palmyra nungi anülulentip tsütsüleni kilometer 70 shi pilar, IS teloki tashiyim agi agia aliba Sukhna yimtia tanü nungi tenzükba amakba osanga jangjaogo.