PAMA aser CMA-i Phek nung tashiyim agi raksatsüba aitsür

Dimapur, October 5 (TYO) : August 2016 nung Chozuba nunger Vengoyi Keyho’er jabaso Surhoseyi (Kuvethi) Keyho-i tetsür tanur ka tashiyim agi raksatsüba kukua aitsür, ta Phek Area Mothers Association (PAMA) aser Chakhesang Mothers Association (CMA) nati sangdong ka nung metetdaktsü.
Tanutsülaji Phek jila nung K. Soho’er kidang yariteper ka liasü aser Kuvethi-i Bethany-I colony nung par kidang tashiyim agi raksatsü, ta sangdong nungsa ashi.
Kuvethi-i aiben tanutsüla tashiyim agi raksatsü saka tanutsülai anogo ishika tejaklen ang tatalokba osangtem metetdaktsüba sülen iba osang temai adok. Kuvethi-i inyakba mapaji tesempatsüka aser meimchiri maremzüktettsüsa inyakogo. Anungji, ozüng amertemi pa ozüng tapet agi merenshitsüla aser bail temelaba magütsütsüla, ta PAMA President Besuvolu Venuh aser CMA President Zaposhelu Venuh nati sangdong nung shia lir.
PAMA aser CMA-i tashiyim agi raksatsüsang kukua aitsür aser takoksa ajurur den tejashi lemsateper. Iba tatalokba ya nisung ajaki aitsütsü mepishir, ta sangdong nungsa metetdaktsü.