PAN Asian Food festival agitsü

Dimapur, Sept 30 (TYO): Tang mezüng Nagaland nung Naga Bowl Express-i Oct. 2 nungi Oct. 8 tashi anüngdang 11:00 ako nungi aonung 8:00 ako tashi PAN Asian Food festival ayongzüka agitsü; iba fest nung Thailand nungi award angur Chef, Manee Phaprom adentsü, ta osang ka ajanga metetdaktsü.
Chef Manee ya Thai, Vietnamese, Korean, Malaysian aser Chinese chiyungtsütem renemba nung mongin lir, aser lai küm 40 dak tema chef inyaka arur. Lai India nung kanga nüngtugu 5 star hotels nung inyaka aruogo aser item rongnung Marriot Welcom Hotel, Maratha Sheraton Hotel aser Courmet Palace dena lir.
Naga Bowl Express kibur, Alemla Jamir-i ashiba agi, asen nübur nem chiyungtsü tapu balala chidangdaktsütsü atema lai mapang shia la indang restaurant nung iba ama food festival ayonga agia arudar, aser maneni tang ayongba fest nunga chiyungtsü sapurtemi iba maongka agitsü imlar.
Manee-i northeast semdangnüa liasü, kechiyong asenok tereprangtsü aser chiyungtsü mesükteper. Manee-i, “Ni India nung inyakdang ni northeast nüburtem indang aika angazükogo. Ni northeast nüburtem den tesendaktep tajung lir,” ta ashi.