Pan Naga Hoho kübok Naga nunger lushi ajak aittsü : Muivah

Dimapur, August 25 (TYO) : Naga nunger lushi ajak yimten ka kübok alitsü asoshi India den Naga yimten latettsü asoshi renemba maparen ajanga Pan Naga Hoho ka tentettsü, aser iba telok dakji Naga nunger asoshi temzüng ozüng latettsü aser itemji mapa küma inyaktsü tashi alitsü, ta tanü Mongolbar nü Dimapur nung Naga nunger lokti tentet lenirtem jaoka Naga yimten tebilemtsü latettsü atema shisalemsatepba mapang NSCN-IM tongti zülur aser GPRN nung ato kilonser Wb.Th.Muivahi metetdaktsü.
Tanü iba senden nung sendena alirtemi August 3 nü India den renemba ken o ji metetdaktsütsüla aser kodang Naga yimten ken o latetdir, Naga nunger alushi kata mezüdoki Naga yimten kübok aitdaktsütsüla ta nenshipet nenshia ashiba ken o langzüa ashidang, NSCN-IM leniri iba ken o ya metetdaktsü.
Naga yimten latettsüba mapa ya India den jembir asünungji, parnok tebilemtsüjia angatettsüsa akümer aser tangatettep kati arutsü jembir asünungji temeshia meshitsü aser tagütsüa agütsütsü ta asüba tangatetba nung inyaktsüsa akümer, anungji Naga nungertemi ibaji angatetdaktsüner ta Muivah-isa ashi.
India den külemi dang alitsü saka yimten tashi lemsar yimsü asütsü, aser Naga nungertemji Naga nunger li aser yangji aliba rongsen madak kibur asütsü ta NSCN-IM tongti zülurisa ashi.
“Asenoki aginüba noklang nung noklangbo mataloktsü saka yakta yimten telatetba kati arutsü, kechiyong India nunger yimten lenirtem mulungjang melenshiogo aser tangatetba kati aruogo,” ta Muivah-isa metetdaktsü.
Paisa Naga nungertem dang kati ka dang taitokteper Naga nunger asoshi tajungtiba telemtetba agidi ta ayongzük.
Iba kasa senden nung NSCN-IM lenir, Wb.V.S.Atemi jembidang, tang tashi nung India den Naga yimten ken o latettsü asoshi onük aika renema lir asen ano aika merenemi lir, anungji Naga nungertemi maneni sarasademjang ta mepishia metetdaktsü.
“Kodang Naga yimten telemtetba kati arudir, ibaji Naga nunger asoshi merak taket asütsü, kechiyong yamaji inyaktsü onoki nangzüka lir,” ta paisa ashi.
Tanü iba senden nung Lok Sabha MP Wb.Neiphiu Rio-ia jembia liasü. Paisa Naga yimten telatetba kati arutsüsa tangatettep kati arutetba atema Prime minister Narendra Modi aser NSCN-IM lenirtem nem tenüngsang agütsü. Iba ama mapang ka nung NSCN-IM teloki telok ajak tsütsü tejak shia külemi inyaktsü merangtsüla ta paisa metetdaktsü.
Iba senden nung Naga hoho tir Wb.P.Chuba Ozükümi anir Naga nunger kin aser lokti tentet balala nungi lenirtemi shisalemsatepa liasü. Tejembir ajaki Naga nunger yimten telok ajaki shilem agia telatetba bener arutsü asoshi ajungshia liasü.