Panama ken o nung alirtem anema PM-i meinyaker: Gogoi

Guwahati, April 09 (Agencies):  Honibarnü Assam Chief Minister, Tarun Gogoi-i, Panama ochimashi ken o nung densema alirtem anema Ato kilonser, Narendra Modi-i kecha meinyaker, kechiyong iba ken o nung densema alirtemji pa den metettepa alirtem lir, ta aitsü.
“Panama ochimashi ken o nung densema alirtem nem Modi-i temerenshi magütsütsü, kechiyong parnok teimbaka pa den tesentaktep tajung alirtem lir,” ta Gogoi-i osangbenertem dang ashi.
“Ochimashirtem ajak atema tejenokdakji BJP party lir. Parnok rongnung nisung kati BJP nung denra, pai ozüng alema aibelenba ajakji agientsü,” ta paisa ashi.
Bihar nung BJP-i tamakok anguba dak sentakba nung Gogoi-i, “Bihar-i Modi nem telangzüba agütsüogo, Gujarat nung Panchayat election aser Banaras (UP)-i BJP nem tamakok agütsü aser tang BJP tamakok ngudaktsütsüji Assam shilem lir,” ta ashi.
“Onoki menden kwi nung takok angutsü’ar ibaji tejangja shitettsüsa ni tarutsü tia taakzür ka masü, ajisüaka sorkar kümtettsüsa onoki menden peria angutsü. Lower Assam nung taoba dang nungi onoki tang menden tiemba angutsü. Onoki menden 60 dang nungi tajemba mangutsü,” ta paisa ashi.
Gujarat model indang jembidang Narendra Modi-i Gujarat nung tanur mapa inyakdaktsübaji shilem 31.6 aliba amadoker, ajisüaka Assam nungbo ibaji shilem asem nung ka dang lir, ta Assam chief minister-i ashi.
“Linük nung memerüktiba yimtitem rongnung Guwahati densema lir ta Modi-i jembiogo, ajisüaka India nung tajungtiba yimtiba 10 rongnung onok densema lir, ajisüaka Gandhinagar (Gujarat yimtiba) aser Varanasi (Modi’er constituency) nabo tesülen talangka atsüngzüka lir. ‘Swachh Bharat Abhiyan’ nungi senjang kata menguaka onoki mapa aika inyakogo,” ta paisa shisem.