Panama list nung alir India nunger tenüng sangdongtsüla: SP

New Delhi, April 27 (Agencies): India nunger saru magütsüi Panama list nung bendanglen account lapoka alirtem tenüng sangongtsüla, ta Bodhbarnü Rajya Sabha nung takhangba ka agütsü.

Rule 267 kübok Samajwadi Party (SP) nungi Naresh Agrawal-i onük lemtepba thinener iba onük nung o lemteptsü atema benoka pai, Panama nung amenoka aliba law firm Mossack Fonseca indang file nungi tenüngtem prokshiba atema sorkar kecha meinyaker, ta aitsü.

Panama-India tax tezüngzüktep kübok company temi parnok headquarter aliba linük nungang saru agütsütsü lateta lir. Anungji ochimashi senji India nungi Panama-i oa meshiteter, saru kanga ishika, shilem 5 agütsür, iba sülen senji meshiteta FDI ama bener arur, ta SP leniri ashi.

Panama-India tax tezüngzüktep kübok, Panama-i company kiburtem tenüng memetetdaktsütsüla, ta pai ashi. Paisa, saru paitoktsü aser ochimashi senji meshiteta temesüng akumtsü atema iba lenmang amshirtem tenüng ajak sorkar ket nung lir, ta ashi.

BJP-i parnok sorkar tashii arura ochimashi sen ajak kaktettsü ta nangzükogo, ajisüaka parnoki iba atema tera dang inyakteta lir, ta pai ashi.

“Kechiba nenoki tenüngtemji mesangdonger (?) Aser iba atema nenoki kechisa inyaka lir,” ta pai sorkar dang asüngdang.