Panama Papers nung tetshia alir ajak nem tetuyuba agütsüogo : Centre

New Delhi, April 29 (Agencies): Panama Papers nung tenüng tetshia aliba India nunger ajak nem sorkari tetuyuba agütsüogo saka tax ozüngtem ajanga item asoshi ken o tem okadak mebenok tashi osangtem yimjak nung metetdaktsütsü noktanger, ta tanü Centre-i Lok Sabha nung metetdaktsü.
Saru magütsüi miimshiba aser ozüng alema sen rizüngba dak sendakba tasüngdangbatem langzüdang Union Finance Minister, Arun Jaitley-i Panama Papers leak den sendaka alir ajak nem tetuyuba agütsüogo, ta telangzüba agütsü.
Ajisüaka, Income Tax Act nung Section 138 ajanga iba dak sendakba ken o okadak mebenok tashi osang yimjak nung memetetdaktsütsü noktanger, ta paisa shisem.
Tanü Minister of State for Finance Jayant Sinha-ia tanga telangzüba ka agütsüdang, HSBC aser Panama-i agütsüba paper tem den foreign black money indang onük sorkari reprangshimdar, ta ashi.
Taoba ita Panama Papers leak sülen Income Tax department-i nisung aser telok 50 shi ka nem questionnaire ka agütsüogo aser iba nungji parnok dang linük adena orr tangalen rongsen yua aliba indang asüngdanga lir, ta osang ka ajanga metetdaktsü.
Panama Papers leaks nung India nunger nisung 500 shi ka tenüng tetshia lir aser parnok rongnung shishilembar tetsüditem, film celebrity tem aser tanga tongti mapa inyaker aika lir.
Iba dak sendakba ken o tem bushisüngdangtsü atema Centre-i Multi-Agency Group (MAG) ka tentetogo aser iba telok nung IT department (CBDT), RBI, Financial Intelligence Unit aser Enforcement Directorate nungi ketdangsertem dena lir.