Panasonic-i India nunger atema 4K camera sayaogo

New Delhi, November 21 (Agencies): Alima nung noksa tangotsü jangrartemi noksa tajungba tangoktettsü atema 4K technology kanga nüngdaka aliba mapanga ka nung tang Panasonic-i 4K ajanga amshiba camera tasen kar India nung sayaogo.

Parnok meyong LUMIX tarensen nungi DMC-FZ1000 aser DMC-FZ300 camera tem ajanga mashi nisung kati mamangtetba 4K noksa aser video tajung tangoktettsü. Item camera agi tangokba noksa ji ‘full-high definition’ dang nungi pezüsü agi tajungba lir.

“Panasonic meyong LUMIX tarensen camera tem ajanga tangokba noksa tem kanga mesüktepa adoker aser tan ‘4K advanced technology’ enoksemba ajanga temelenshi ulura bener aruogo,” ta Panasonic India nung product head, Gaurav Ghavri-i Hokolbarnü metetdaktsü.

“4K noksa aser video tem nung ‘ultra-high definition 4K’ densemba ajanga HD melendoker aser ibaji ajanga India market nung tajangzük tulu angutsü onok timla lir,” ta pai ashi.

4K technology/4K horizontal resolution nung inch shia 4,000 pixels (pixels per inch, PPI) keta lir.

“Noksa tangoker mongin aser tetenzüker ajak asoshi Panasonic-i ‘4K imaging’ oset sayatsüogo aser iba ya ajanga technology tensa den tokteptettsü,” ta Ghavri-i ashi.

Tan sayaba camera ana yagi resolution tulu aliba noksa-a tenük mesepshidang tangoker alitsü.

Camera mela amshitettsü asoshi LEICA lens enokja lir.

‘High-precision OLED’ enokja aliba ajanga tesangwa peria maliba tesem nunga LCD dang nungi tajungba noksa tangokteter.

Camera nungsa Depth from Defocus (DFD) keta aliba ajanga kara tangokba noksa tema kanga junga adoktaktsür.

DFD ajanga noksa tangokdang ‘high-speed autofocus’ atema second 0.09 ang agir aser iba den külemi noksa ka tangoker tanabuba tangoktsü asoshi mapang second 0.66 sülen tangokteter.

Ajak dang tajungbaji ano item camera ajanga tangokba 4K video nungi 8 megapixel noksa agizüktettsü.

Item camera tem nung functions asem talila enokja lir— 4K Burst Shooting, 4K Burst S/S (Start/Stop) aser 4K Pre-burst.

Camera anaprong ya Wi-Fi, smartphones aser tablets den sentaktepa amshitettsü.

DMC-FZ1000 aser DMC-FZ300 camera tem ya India nunger dang 45,990 aser sen 58,990 agi ayoktsü.