Panglong mongdang

Akhidang Burma ta jaa aliba lima, Myanmar nung Naga nunger amai kin tapu balala 135 lir aser itemji Myanmar kübok yimjung nung yimten tashi balaka agütsür lidaktsütsübaji Myanmar government asoshi teinyaktsü tongtibangtiba rongnung ka lir. Atangji, India tsütsü Naga nunger nem yimten tashi balaka agütsür yimjung nung lidaktsütsü merangba o Myanmar nung aliba kintem yimjung nung lidaktsütsü asoshi merangba mapa ana ya tera mesüktepa lir. Anapronglaji mapa tebenja aser putepdaktsütsü tasak. Ajisüaka, Myanmar nung Aung San Suu Kyi-i aniba National League for Democracy (NLD)  telok nükjidongji kechisüdir süaka Myanmar nung aliba kin tilatemji yimjung nung Myanmar yimten kübok alitsüla ta tangatetba nung inyaker. Ibayongji, 2015 küm Myanmar election nung NLD telok takok tulu anguba sülen 2016 küm August nungbo Panglong nung Myanmar kintem rongnung yimjung jembitsü asoshi mezüngbuba 21st Century Panglong mongdang ayongzük. Ibayongji, Panglong mongdang ta ajar. Iba mongdang nung Myanmar nung aliba kin balala ajak dena yimjung ken o renemtsü meranger. Atangji, Aung San Suu Kyii telok government nung malidanga 2015 küm October nung National Tripartite Committee ajanga Nationwide Ceasefire Agreement kin ti den renema liasü. Iba National Tripartite Committee nung shilem agir telok asemji sepaitemi aniba government, political party-tem aser kin titemji liasü. Tang Aung San Suu Kyi arur külen lai Ceasefire Agreement nungji kin tiji dang masü saka anünga aliba kin ajak tendaktsüner. Item rongnungji Myanmar nung alir Naga kin-a dena lir. Mezüng Panglong mongdang ya Aung San Suu Kyi tebu Aung san alidang pai Myanmar nung aliba kintem kata medokshii ajak anidena telongjem aser teputep nung alitsü asoshi inyakba mapa ka liasü. Iba senden nung lemtetba dangji 20th Century Panglong Peace Agreement ta aja. Pa leniba nung Burma yimten nüjiso angu. Ajisüaka, pa küm 32 asüdang tangari pa tepset. Aji oda, pa sülen yimsüsürtem shingaia Panglong nung renemba yimjung mapaji takok ngua bener moutet. Aji oda, pa sür küm 70 sülen, tang par jala Aung San Suu Kyi-i Myanmar nung aliba kin 135 prongla yimjung nung Myanmar yimten nung state shia sademsadema inyaktsüsa yimten tashia tuluba agütsütsü tebilemba nung kanga temulung agüja inyakdagi. Iba tangatetba nung tanabuba 21st Century Panglong Peace Conference taoba ita May 24 nungi 29 tashi mongogo. Atangji, tanga kin teneti akümba United Nationalities Federal Council-i tamasa yangluba Nationwide Ceasefire Agreement khen meyipa reprangshidaktsüner, iba jagi parnok mongdang nung maden. Ano, külen  Kachin Independence Army (KIA) aser United Wa State Army (UWSA) teloki aniba nung adener kin tenetbo iba mongdang nung dena shilem agiogo.  Tanü Myanmar yimten tia iba ama tensa ka nung nokdaka lir. Atangji, Myanmar nung aliba kintem putepa alitsü aser Myanmar government kübok kin ajak tangatettep alitsüsa yimjung ken o aser yimten yimsüsübaren latettsübaji Aung San Suu Kyi asoshia tasak asütsü, kechiyong iba ama maparen nung tangar bendanger kin teka dena amuoka lir. Aji oda, talisa China ama kin teyari medeniang Myanmar nung kintem rongnung yimjung aser tangatettep meyanglutettsü. Tanü yangi Panglong mongdang indang asenok den lemsatepba ya asenok Naga nungertema dena aliba agi metettsü tim ta bilema lemsateper. Aji oda, Myanmar nung Nationwide Ceasefire Agreement nung NSCN-K teloka dena lir. Myanmar nung asenok Naga nunger kin aser nütsüng aika lir aser parnok aliba lushijia alima tuluka. Item ajakji Naga lima lir. Tang amai asenoki alima yimten yimli balala kübok asütsüa akok saka asenok ajak azü agi sosemba adianu aser kinungertem lir. Iba tangatetba nung Naga nungeri Naga nunger meima putepa alitsüla aser yariteptsüla. Aji oda, Panglong nung Myanmar yimten ken o lemtetba ajanga Naga nungertema temeten aser shilem tajung ka ngura, ibaji asenok ajak asoshi temoatsü aser maongka tuluka asütsü.