Pangsha lendong nung asür ajak agi 8

Dimapur, August 30 (TYO): Tuensang district kübok International Trade Center, Pangsha anasa taoba Hokolbar nikongdang Assam Rifles purtemi nisung ti khasetba rongnung anabo NSCN-K pur masü civilian liasü, ta jangjaogo.Tenapronglaji Mon district kübok Tobu sub-division nung Yangkhao yim nungi ka Anten Konyak aser ka Enzo Konyak liasü; Tena ya NSCN-K pur gari nung Henpo yimtaki kiset shiruru kar alitsü aoerba liasü.
Ano, kasa lendong nung tetsür ka khasetbaji NSCN-K lenir Joseph Sumi kinungtsü Atoli Sumi liasü aser tanüngba nisung pongopronglaji NSCN-K purtem liasü, ta jangjaogo.
Iba kasa lendong nung tetsür ka tenüng agi Kakheni Sumi yiru aser laji NSCN-K lenir Isak Sumi kinungtsü liasü. Laji Honibar anepdang yakta Tuensang mozü kidang yarir külen mozü ki tajungba bushia tangaleni yokogo ta angazüker. Ano kasa lendong nung tetsür ka tenüng agi Thamneyu liasü. La ya Mynmartsür Henpo yim nungi liasü ta angazüker. La ya temang meshitak asüba agi mozü kidangi orr par yimtaki meyipa aoba mapang iba lendong ya atalok.
Pangsha lendong nung Assam Riffles purtemi khasetba NSCN-K purtemji Lieutenant Joseph Sumi, Captain Medoneizo Nakhro, Robin Sumi, Kukhavi Sumi aser Seipu Kuki nungertem liasü.
Iba lendong atalokba sülen, NSCN-K sangdong ka nung, India nunger sepaitemi Pangsha nung injang prangpong mebeni senzüa alir Naga nunger linük tenzükertem tepsetba mapa jagi alima tsüngdang India sepaitemi Naga nunger tetsü tasoli yimten temeten asoshi nokdakba mapa nung kodanga makoktsü ta tarutsü pututem nung kuli asütsü aser Naga nunger linük tenzükertem taküm tenla agütsübaji ajanga ano tetsü tasoli meimba tanüla tali jangrudaktsütsü ta metetdaktsü. Item tenlatemji Naga nunger yimten nüjiso asoshi raraba otsü nung kodanga amajok makümtsü, ta NSCN-K sangdong nungsa metetdaktsü.
Linük asoshi taküm agütsüba mapaji ano kasa nung shia arutsü aser Naga nungertemi pei tetsü tasoli temeten asoshi raraba mapa nung nübo aser tanüla nung kodanga tashimait makümtsü, ta parnokisa ashi.
Naga lima kümzüktsü mechi NSCN-K aser nübortem shirnoki senti taküm tenla agütsüogo, parnok tenlaji Naga nunger tetsü tasoli meimer ajaki amajok mekümdaktsüi pu sema nokdaktsüla, ta NSCN-K sangdong ajanga mepishia metetdaktsüogo.
Kasa sangdong nungsa, tsükchirtem den külem ser linük tenzükertem anema inyakertem asoshi linük temzüng nung aliba ama obendangba ajurutsü, ta NSCN-K purtemisa metetdaktsü.
Assam Rifles purtemi khasetba NSCN-K pur pongo rongnung ka tenüng agi Capt. Medoneizo Nakhro den asüpila sentep Kohima district kübok Piphema town nung Deobar nü liogo.