Pangsha tatalokba atema jashir: NMA

Kohima, August 28 (TYO): Taonung Nagaland nung tetsür tentet tulutiba, Naga Mothers’ Association (NMA)-i sangdong ka ajanga, tanü Tuensang district, Noklak sub-division kübok Pangsha nung Assam Rifles aser NSCN(K) tsüngda kahtepdang tai maket tetsür ka tepsetba aser ka yirutsüba osang angashia kanga aoksar aser jashir, ta metetdaktsüogo.
NMA Advisor Rosemary Dzüvichü-i, “Pangsha nung NSCN(K) lenirtem den yimjung senden ka amentsü asoshi tanü nikongdang NMA nungi teshimtet telok ka Tuensang atong, ajisüaka Assam Rifles aser NSCN(K) na tsüngda kahtepba osang angashia kanga aoksar,” ta ashi.
“Health worker tetsür ka tepsetba aser ano tetsür ka (SSA tesayur) injang agi yirutsüba osang angashia onok kanga jashir,” ta NMA Advisor-isa ashi.
“NMA nungi teshimtet telok ka tanü Tuensang-i ao aser asüng Pangsha nung NSCN(K) lenirtem dang Centre sorkar den ceasefire agienba telemtetba reprangshitsü atema mepishia yimjung senden ka amentsü sentong liasü,” ta laisa ashi.
Rosemary-i ashiba agi, NSCN(K) pangdak lenirtemi Naga Hoho aser Eastern Nagaland People’s Organisation nungi teshimtet telok majurudang NMA den tamasa o lemtep kanür ta shia NSCN (K) lennirtemi yimjung senden alitsü atema NMA jaok.
Ajisüaka tanü tatalokba ajanga parnoki NSCN(K) lenirtem majurutettsüa akok, ta laisa arentaka bilemba ashi.
“Sepaitemi iba ama inyakba ajanga India sorkari asen lima nung chichiba yimjung alitsü asoshi süoki ia bilema mali ta sayur,” ta NMA advisor-isa metetdaktsü.
Centre sorkar aitsüba olen ka nung lai, ceasefire tezüngzüktep agitsü atema ken o jembitsü asoshi NSCN(K) agizüka dang lir ta Centre-i jembia lir, ta ashi.