Pangti nung molulem wazüka ayutsü nüngtem nung long azüngogo

PCCF aser HoF, M Lokeswara Rao-i Pangti yimtak Amur falcon (molulem ozü) wazüka ayuba nüngshilong sayatsüba noksa nung angur.
PCCF aser HoF, M Lokeswara Rao-i Pangti yimtak Amur falcon (molulem ozü) wazüka ayuba nüngshilong sayatsüba noksa nung angur.

Kohima, January 21 (TYO) : Principal Chief Conservator of Forest, Nagaland aser Head of Forest Department, M Lokeswara Rao-i molulem wazüka ayutsü nüngtem nung Wokha district nung aliba Pangti yimtak yashi Bodhbarnü tamaitsü lung ka azüngtsüogo.
Iba sentong nung jembi dang, Rao-i, iba tamaitsü lung ya tarutsü mapang nungbo nüngshilong ka akümtsü kechiba süra iba tamaitsü lung ajanga Pangti nungeri arem shiruru wazüka ayuba otsü metetdaktsütsü, ta ashi.
Pai, Nagaland nung lipoküm wazüka ayuba maparen tulu tenzükbaji Pangti nung molulem wazüka ayuba inyakyim ajanga lir aser iba inyakyim yagi state tesem ajak süngogo koba agi lokti ajaki Naga lipoküm wazüka ayuba maparen nung kanga nendaka inyaker.
Rao-i, iba inyakyim ya manentsüla aser lokti balala den nübur ajak teyari ajanga Forest department-i lipoküm kümzüka ayuba tsütsü nungita yaritsü, ta ashi. India Biodiversity Award 2016 atema Pangti-a benoka lir, ta pai shisem.
Tsüngküm mongpu melenshiba mapang tesem ka nungi ka melena aliba ozü, molulem ya 2001 küm Pangti nung meyirjang aika yimzüa angu. Iba sülen küm shia timba küma ao.
Arem shiruru kümzüka ayutsü tetuyuba tajung maliba aser memetetba ajanga shikarirtemi iba ozü kaseta achitsü tenzük. 2006 küm nungibo parnoki iba ozü ya net mesanga yur pua yokmeso.
Aji oda süaka, 2012, October ita iba ozü aika kasetba ngua, 2013 küm nungi State Forest & Wildlife Department aser NGO telok balalai item ozü kümzüka aser wazüka ayutsü asoshi tetuyuba agüja liasü.
Iba tetuyuba angutsüba ajanga yimtak yimsüsürtemi anir yimtak alir ajaki molulem kümzüka ayuba nung shilem agitsü telemtetba agia iba ozü metepsettsü ozü azüng.
2013 küm Pangti ya “Falcon Capital of World” ta tenüng agütsüogo.
Pangti nungeri molulem kümzüka ayuba tsütsü shilem tulu agiba ajanga Pangti village council nem Department of Forest, Government of Nagaland-i ‘meritorious Award 2014’, Governors Commendation Certificate Government of Nagaland, Royal bank of Scotland-i ‘Earth Heroes Awards 2014’ aser Assam-i ‘Balipara Foundation Award 2014’ agütsüogo.

You must be logged in to post a comment Login